NAGPAUWAN og three-point shots ang batan-ong si Luka Doncic aron agakon ang hosts Dallas Mavericks ngadto sa 120-112 nga kadaugan batok sa Portland Trail Blazers sa National Basketball Association (NBA) kagahapon.
Ang Slovenian superstar nagpakatap og 35 puntos lakip na niini ang walo ka three-point shots aron pangulohan ang kadaugan samtang nidugang og 29 puntos si Tim Hardaway Jr.
Ning sangkaa, aduna unta’y kahigayunan si Doncic nga matupngan ang franchise record ni Jason Kidd nga 21 ka triple-doubles sa usa ka season apan wala na siya nanumbaling niini human nangigo ang iyang mga tres.
“It’s crazy,” asoy ni Dallas team owner Mark Cuban. “To give J-Kidd some credit, the game’s a lot faster now, there’s a lot more points being scored. So it’s all relative. What he’s accomplished is just phenomenal.”
Ang katapusang three-point bomb nga gipaulbo ni Doncic nakahatag sa Mavericks og 11 puntos nga labaw sa hinapos nga bahin nga maoy nag-abli og dako sa ilang pultahan paingon sa kadaugan.
“We were locked in at the end of the game,” matod ni Doncic, kinsa mitali og 8-of-12 sa three-point shooting.
Sa kinatibuk-an, ang Mavericks nakapasulod og 20 ka three-point shots nga maoy naghatag og dakong problema sa Trail Blazers sa kinatibuk-ang kombati.
Ang Mavericks, ningkombati nga wala ang usa sa ilang labing pambato nga si 7’3” Kristaps Porzingis, ningsaka sa 27-15 nga rekord nga nagpahimutang kanila sa ikaunom nga dapit sa Western Conference.
Kini maoy ika-10 nga sunodsunod nga duwa nga wala nakapakita og aksyon si Porzingis gumikan kay nagpaalim kini sa angol sa iyang tuo nga tuhod.
Ang Trail Blazers, nga nahagbong sa 18-25 nga rekord, gipangulohan ni Damian Lillard pinaagi sa iyang 34 puntos samtang niamot og 22 puntos si Carmelo Anthony.
Sa hinapos nga bahin, ningbahar ang opensa sa Trail Blazers diin nasipyat sila sa ilang lima ka mga itsa.
“Every time we play Dallas, we end up having one of these games,” asoy ni Trail Blazers coach Terry Stotts. “Very competitive, teams get leads and some other team comes back. Doncic is a great player and when he’s making his 3s, even better.”
Human sa maayo niyang gipakitang duwa sa nag-unang tulo ka quarters, si Lillard nagsalimoang na sa 4th quarter diin igo lang siyang mitali og 1-of-6 shooting.
“Obviously, I think any time you are under the weather, a little bit sick, it’s going to have an effect on you on the floor,” matod ni Lillard.
“But I didn’t go into the game thinking like, ‘Oh, I’m sick.’ It was never an option for me to lean on that.”
Sa laing mga duwa, ningdaog ang Atlanta Hawks batok San Antonio Spurs, 121-120, Miami Heat batok Oklahoma City Thunder, 115-108, Memphis Grizzlies batok Cleveland Cavaliers, 113-109, Toronto Raptors batok Washington Wizards, 140-111, Philadelphia 76ers batok Chicago Bulls, 100-89, ug Indiana Pacers batok Minnesota Timberwolves, 116-114. / AP, ESL