GUMIKAN sa kasamtangang sitwasyon sa Taal Volcano, ang simultaneous 7-Eleven Run Series nga ipahigayon sa Manila, Cebu City ug Davao City giuswag sa lain nga petsa, matod sa mga nagpasiugda.
Sa orihinal nga eskedyul, ang lumba ipahigayon unta karong Pebrero 2, 2020 apan napugos ang mga nagpasiugda nga iuswag kini gumikan kay naa sa high-level alert ang Taal Volcano nga delikado alang sa mga partisipante gikan sa Manila.
Ang Taal Volcano, nga gialirungan og tubig sa Taal Lake sa Batangas adunay gilay-ong 70 kilometros gikan sa Manila.
Ang bulkan naa sa Alert Level 4, ikaduhang labing kuyaw. “Due to the situation at Taal and the potentially hazardous effects in the event of an explosive eruption, (the 7-Eleven) Run 2020 across all venues in Luzon, Visayas and Mindanao will be postponed to a later date to ensure the safety and the well-being of the participants, employees and event partners,” opisyal nga pamahayag sa mga nagpasiugda nga gipadangat sa media.
Gipasabot sa mga nagpasiugda nga ilaha ra unya ianunsyo kon kanus-a mapahigayon ang lumba nga gilangkuban og 42-kilometer individual, 42K relay, 32k, 21K, 21K relay, 16K, 10K, 10K buddy, 5K, 5K buddy, 3K ug 1K categories. / RSC, ESL