Sabungero gibugha sa Agdao

DEAD on the spot ang usa ka handler og manok human pusila sa wa pa mailhing mamumuno, alas 4:15 sa hapon niadtong Biyernes, Enero 17, sa StarCross Street, Davao Farms Village, Barangay Lapu-Lapu, Agdao District, Davao City.

Ang biktima nailhang si Alison Rosal Cugay, 68-anyos, handler og panabong nga manok ug nagpuyo sa nasampit nga dapit.

Sa impormasyon nga nakalap sa Superbalita Davao, ang biktima naglakaw lamang sa dapit dihang kalit mibutho ang mamumuno dayon gipusil ang biktima.

Naintimano ang biktima nga maoy hinungdan sa hinanaling kamatayon niini.

Sumala sa kapuyo sa biktima nga si Lourdes, wala siya’y nahibal-an nga dunay kabikil ang iyang kapuyo.

Apan pipila ka mga silingan ug mga higala nagtuo nga dunay nakabangi ang biktima sa hisgutan nga sabong.

Ang patay nga lawas sa biktima gihaya na sa iyang pamilya samtang ang kapulisan sa Sta. Ana Police Station padayong naghimo og makuting imbestigasyon sa hitabo. (Jeepy P. Compio)