SUPERBALITA DAVAO

Compio: Viva Pit Senyor!

Tipik sa Kagahapon

KARONG adlawa, Enero 19 ang kulminasyon sa Sinulog Festival didto sa Sugbo, ug napanaad na gyud nako sa akong kinabuhi nga matag kasaulogan sa Sinulog, moduyog gayod ko niini, sa pagtuo nga dunay hatod nga grasya ang batang Santos, Senyor Santo Niño.

Molupad kos Cebu City karong hapon, ug siyempre mosaksi ko sa penale nga mga pasundayag sa Plaza Independencia. Sukad pa niadto, kini akong paborito nga dapit, kay wanang, hinungdan nga di gyud magpunsisok.

Hinuon sa miaging semana pa ang mga pasundayag, dunay mga parada ug street dancing diin ang mga deboto nagdinalhanay og mga replica ni Senyor Santo Niño.

Gikan sa milabay nga semana, matag karon ug unya, ang pagpahigayon og kasaulogan sa Misa sa Basilica Minore del Santo Niño diin liboan ka mga deboto ang misalmot.

Di sab ko magdahom nga makaduol ug makapapiktyur sa Magellan’s Cross kay kung Sinulog labi na og katapusang adlaw, nagpunsisok gyud ang mga tawo sa kilid.

Mas maayo kung sa adlaw palang unta nga Biyernes naa na sa Cebu aron mabati gyud ang Sinulog Festival, apan sama nako nga perte ka busy sa eskuylahan ug sa opisina, modaginot nalang gyud ko sa katapusang mga programa.

Sa mga deboto mamahimo nga magsaulog kita sa adlaw nga natawhan ni Senyor Santo Niño diha sa atong mga panimalay. Dagkotan nato sila og kandila sama sa regular nato nga ginahimo matag alas 6 sa gabii, butangan og buwak, dayon motimbaya kita og Happy Birthday, simple di ba?

Sa tibuok nasud ning adlawa, daghan sab kaayo ang nagsaulog sa kapistahan, busa hinayhinay lang, kay naseguro gyud nato nga daghan kaayo ang mga hubog karon labi na sa pagsawop sa adlaw.

Manggawas baya dayon ning mga bakak nga istorya ug mga hinambog kung mahubog na nga maoy hinungdan sa kasamok, resulta nga sa prisohan makatulog.

Bitaw, balik ta. Ang pagkabalaan sa batang Santo alang sa mga deboto naghatud kini og kaayohan ug kahingpitan natong mga buhi ning ibabaw sa kalibutan.

Sa mga lahi sab og persepsyon sa kinabuhi, walay Santos ug walay Ginoo nga sentro kanila, kun di ang ilang gituohan ang ilang kaugalingon kung paunsa sila manginabuhing natural bunga sa ilang mga pagpaningkamot.

Alang nako, ang pagtuo sa Diyos ug sa mga Santos sa tinuohang mga panahon maoy usa sa nagpalig-on sa akong pagsalig sa kaugalingon, maoy hinungdan sa akong makanunayong pagpasalamat sa mga grasya nga akong nadawat ug niining maayong panglawas.

Ang Diyos maga-uban kanato sa kanunay. Hinaut pa unta.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph