Trak nahug sa tulay, drayber patay

MATANAO, Davao del Sur -- Patay diha-diha ang drayber sa usa ka trak human nahug sa tulay sa sapa dihang nawad-an og kontrol sa manobela ug mibangga sa depasaherong bus.

Nahitabo ang insidente sa Davao-Cotabato national highway sa Barangay Camanchiles, alas 10 sa gabii, Biyernes, Enero 17.

Sa tahong gipaguwa sa traffic section sa kapulisan, naila ang namatay’ng drayber nga si Edgardo Gascon Provido, 38, minyo, molupyo sa Kalawag 1, Isulan, Sultan Kudarat.

Naangol sab ang pasahero sa trak nga si Alexander Fernandez, 39, minyo nga taga Sultan Kudarat.

Sumala ni Corporal Niel Arvin Babaylo, traffic investigator, nga gimaneho sa biktima ang usa ka forward truck nga nagbaton sa plakang GEH 707, apan kalit kining mitipas sa pikas tampi sa dalan diin gikasugat ang Mindanao Star Bus nga gimaneho ni Allan Soriano Omboy, 46, minyo, molupyo sa Makilala, North Cotabato.

Adunay kapin kon kulang 20 ka pasahero ang sakay sa bus apan suwerteng way bisan usa kanila nga naangol sa insidente.

Gidala ngadto sa Davao del Sur Provincial Hospital si Fernandez aron matambalan.

Ang drayber sa bus gikustodiya sab sa kapulisan samtang ang patay nga lawas sa drayber sa trak gihatud na ngadto sa punerarya sa Bansalan. (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph