Saludo Kami: Pagtabang sa kabataang may espesyal nga panginahanglan

ANG komunikasyon, importante kaayo aron tiunay nga makapaambit sa imong mensahe ngadto sa imong isig-kaingon.

Apan, dunay pipila nga naglisud sa pagpaabot sa ilang mensahe, ilabi na kadtong dunay suliran sa pandungog sukad sila gipakatawo.

Si Andrew Paul Salvo, o “Pau Pau” sa iyang mga higala, misagubang ning suliran.

Sud sa duha ka tuig, si Andrew nagtudlo sa mga bata nga may ‘special needs’ sa Daniel M. Perez Central Elementary School Special Education (Sped) Center sa Bunawan, Davao City.

Si Salvo nakatapos sab sa maong tunghaan. Usa siya ka volunteer teacher dihang anaa siya sa kolehiyo.

Niya, duna may nagtanyag kaniya og trabaho sa laing tunghaan, apan gipili niyang mosilbi sa mga bungol nga kabataan, tungod nakita niya ang ilang potensiyal taliwala sa ilang kakuwang o apan.

Samtang siya nagdako nabati niyang anaa gyud ang pagsilbi alang sa mga ispesyal nga kabataan.

Tuod man, sa ilang pamilya, ang iyang inahan usa ka Sped teacher, samtang ang iyang mauguwang, unang nakabaton sa pagkat-on sa pagpanudlo og sign language.

“My family influenced me to learn sign language. Hence, I entered teaching sign language and now I’m doing it full time,” ni Andrew.

Kaniadto, ang pagkat-on og sign language daw lingaw-lingaw kang kaniya, apan sa kadugayan, mas milawom ang iyang pagsabot dinhi.

“As a sign language teacher, we have a role not just to teach them with the things they need to learn, but also how they will communicate to their parents,” ni Andrew.

Sagad kaso, may mga ginikanan nga may bungol nga anak ang di kamao mo-komunikar sa ilang anak.

“That problem made me realize that as a special education teacher, I need to bridge that communication gap,” sigun niya.

Ang iyang klase nagsilbi sa 10 ngadto 20 ka estudyante.

Layo ra kaayo sa 1:5 nga ‘ideal ratio.’

Luyo sa pagtudlo sa mga bungol nga estudyante, iyaha sab nga gitutukan ang kabataan nga may autism ug intellectual disabilities.

Pipila lamang ang Sped teachers ug tunghaan sa siyudad ug nasud, apan wa kini makapahuyang kaniya ug sa mga kaubanan nga ipadayon ang pagtabang.

“If you are not committed, you would be fed up and quit the job,” sigun ni Andrew.

Dugang pa nga usa sa dakong hagit kanila panaohon nga wala sa maayong buot ang mga estudyante.

“Once you’re used to it, you would then know how to deal with these children.”

Luyo sa iyang pagka-aktibo sa pagpanudlo, miyembro sab siya sa Sign Language Interpreters-Davao Region.

Ang grupo naga-organisa og basic sign language and deaf culture education sa nagkadaiyang institusyon, government agencies, simbahan, ospital, security forces, lakip na prisuhan.

“Learning basic sign language is not only a way for a mutual understanding, but also a way to break communication barriers. There is social inclusivity. They would feel that they are actually part of the community.”