5 pulis wa kalahutay; 1 patay sa giapilang ‘training’

CAMP QUINTIN MERECIDO -- Subayon karon sa Police Regional Office (PRO-Davao Region) kung duna ba’y nahitabo nga mga kalapasan ang pagpahigayon sa Basic Internal Security Operation Course (Bisoc) human lima ka mga pulis ang nakuyapan diin ang usa kanila namatay.

Sa gipagula nga impormasyon gikan sa PRO-Davao, mismong si Police Brigadier General Filmore Escobal, director sa PRO-Davao, ang mimando nga subayon ang pagpahigayon sa Bisoc.

“We will provide assistance and look into possible lapses in the training program,” tipik sa pagbutyag ni Escobal sa journal sa PRO-Davao.

Giingon sab ni Escobal nga kinahanglan andam ang kapulisan sa ingon niini nga training ug gipaklaro nga una gipahigayon ang pagbansay kanila, ang tanang mipailawom niini giagi sa usa ka standard medical clearance subay sa standard operating procedure.

“Bisoc is an enhanced training intended for counter-insurgency operations. And prior to the conduct of Bisoc training, all police trainees underwent the standard medical clearance as a standard operating procedure,” dugang sa journal.

Una niini, lima ka mga pulis ang nakuyapan nga mao sila Patrolman Dexter A. Bucaling; Patrolman Juvanny E. Saydaw; Patrolman Angelo Tito; Patrolman Exel E. Bussalla, ug si Patrolman Fraxsidicio II D. Florentino.

Gilayong gipangdala ang mga nahisgutan sa Regional Health Service (RHS)-Davao apan gipangbalhin ngadto sa Metro Davao Medical and Research Center (MDMRC) ug sa Southern Philippines Medical Center (SPMC).

Apan si Patrolman Tito nakabsan sa kinabuhi niadtong Biyernes.

Sa medical bulletin, migula nga Sinus Tachycardia Secondary to Severe Dehydration nga makonsidera nga heat stroke ang gikamatyan ni Tito.

Ang upat nagpabilin gihapon sa SPMC sukad sa pagsuwat ning balita, Sabado, Enero 18.