NAANDAN na sa nangaging mga Sinulog festival nga dunay mga street party ug uban pang mga kalingawan. Apan tungod sa di maayong mga kasinatian, gidili na kini sa rota sa grand parade.
Sa miaging mga duha ka tuig, gitugot ang street parties mga 300 metros ang radius gikan sa rota sa parade. Karon, gitugot ni Mayor Edgardo Labella ang street parties mga 100 metros gikan sa parade route. Mas duol na kini.
Gawas sa pagpalayo gamay sa street parties, gipatuman usab ang liquor ban.
Naandan na sa atoang kultura nga kon dunay fiesta, dunay kalingawan. Kon dunay kalingawan, dunay inom ug dunay mahubog. Mao ni ang sagad tinubdan sa kagubot, labina kon ang giinom gisulod sa ulo, wala sa tiyan.
Makita usab ang pagpahimus sa mga negusyante sa kapistahan sa Balaang Bata kay bisan nagdili ang kagamhanan sa mga inom duol sa rota, dunay mopalusot. Naa gani natangtangan sa ilang business permit tungod sa mao nga kalapasan.
Bisan tuod kon ang inom ug mga kalingawan tipik sa kapistahan, angay usab huna-hunaon ang relihiyusong aspeto sa kasaulogan. Angay ipatigbabaw ang pagrespeto sa kasaulogan pinaagi sa igo-igo nga lingawlingaw ug di magpalabi sa pag-inom.
Aron malikayan usab ang mga kagubot, mismo ang mga establisemento motabang sa pagseguro nga way mahubog og maayo pinaagi sa pag-limit sa inom ug pagdugang og security personnel kay ila usab kining responsibilidad kay naa sa ilang tugkaran.
Ang mga barangay official usab nga naa ang mga etablisemento nahimutang, angay nga manginlabot kay ila usab nga gimbuhaton ang pagseguro nga malinawon ang ilang dapit.
Makaayo man tuod sa ekonomiya ang kapistahan, apan kinahanglan nga itisok sa alimpatakan sa usag usa nga ang Sinulog di ordinaryong kapistahan kay pahinungod kini ni Sr. Santo Niño. Di kini panahon sa pag-inom-inom ug pagpagpatuyang.