SA maka-usa pa, ato na usab saulugon ang kapistahan ni Senyor Santo Nino. Mao kini karon ang ika-40 ka tuig nga episode sa tinuig nga kasaulogan mabulokon nga Sinulog grand parade. Sama sa naandan, kini giatangan sa tanan, mga lokal ug langiyaw nga turista.
Ubay-ubay gihapon nga contingents apil na ang taga laing lugar mosalmot sa street dancing competition. Basin estrikto karon ang security kay mosaksi si Pres. Rodrigo Duterte sa grandstand.
Luyo sa mga kontrobersiya nga naglimen sa preparasyon sa Sinulog 2020, gipaningkamutan sa mga organizer, labi pa sa Sinulog Foundation Inc. (SFI) ug sa Kagamhanan sa Dakbayan sa Sugbo nga mamahimo gihapon nga malampuson ang pagpahigayon niini. Unya na kita mohusgar kon palpak ba kini o malampuson human sa presentasyon ugma.
Unang kontrobersiya mao ang exclusivity contract tali sa Sinulog Foundation ug MyTV nga mao lamang ang bugtong nga maka-cover sa presentasyon sa mga contingent sa grandstand. Una kining higayon nga adunay ingon niini. Hinuon, gidiskasi na ni Mayor Edgardo Labella ang kontrata human mirebenta ang ubang mga TV network. Free for all na.
Laing kontrobersiya mao ang reklamo sa sponsorship sa usa ka manufacturer og processed food nga wala na sila tuguti nga maka-sponsor karong tuiga human gi-exclusive o locked out ang kontrata tali sa Sinulog Foundation ug sa laing kompaniya nga nag-produce
gihapon og susamang produkto. Hay, pastilan. Unsa-on man nga ang Sinulog Foundation nagkinahanglan man og dakong pundo aron pagtapal sa mga gastu nga dako sab kaayo. Maong commercialized na gyud kaayo.
Pero dili usab ma-ingon ani ka mabulokon ug kahugyaw ang Sinulog kon walay commercialization. Sa bisan asang kalihukan o okasyon dili magmalampuson ug mabulokon kon walay pundo ang mga organizer. Ang mga mo-sponsor sama sa mga kompaniya o produkto aduna usay tumong kon nganong mo-sponsor sila. Apan lahi ang rehilyosong kalihukan ning kapistahan ni Senior Santo Nino ug kulturanhong kalihukan nga mao ang Sinulog grand parade. Busa angay kitang magsadya ug maghudyaka ning kasaulogan sa Sinulog. Pit Senyor! (bobbygnalzaro@gmail.com)