SUPERBALITA CEBU

Diola: Tigpahigayon sa panaghiusa

Mao Diay

NIADTONG 2009 aduna akoy talagsaong bisita sa Sinulog. Magtiayon kini nga Protestante ug ilang upat ka mga binatilyo. Ang amahan usa ka opisyal sa kapulisan. Gisud-ong namo gikan sa ikaduhang ang-ang sa Basilica del Santo Niño ang mga manimbahay sa buntag sa Sabado. Napahingangha ang akong higala ug nakalitok siyag mga pulong nga hangtod karon nagpadayon nga matuod. Nagkanayon siya nga “kon masandayongan pa unta ang maong enerhiya ug gahom sa mga tumutuo ngadto sa pagtukod sa nasod, pagkadako unta sa kabag-ohan sa Pilipinas”.

Uyon ako sa iyang panahom. Apan makaingon pod ko nga pagkadako pa sa atong buhatonon kay matod pa sa ebanghelyo ni Mateo “kon dili kamo mag-usab ug mahisama sa mga bata dili gayod kamo makasulod sa gingharian sa mga langit”. Kining maong kausaban milangkob sa pagpaubos sa kaugalingon. Ang modelo sa pagpaubos usa ka bata dili tungod kay hingpit ang bata kondili tungod kay nagsalig kini sa uban. Ang pag-ila sa atong kinutoban ug pagsalig sa Dios mao ang pagpaubos.

“Diha sa iyang abaga nagtungtong ang paghari,” misulat si propeta Isaias mahitungod sa bata nga sa pamalandong natong mga Kristohanon mao si Jesucristo. Morag gaan lamang ang usa ka reyalidad nga bug-at kaayo. Mapas-an kini ni Jesus tungod kay mapaubsanon man siya. Kon tan-awon nato ang larawan ni Santo Niño, aduna siyay gikuptan nga kalibutan sa iyang wala nga kamot ug sa iyang tuong kamot adunay setro nga maoy simbolo sa gahom. Usa ka bata ang nagkupot niining duha ka mabug-at kaayong palas-anon aron makita nga ang tinuoray nga gahom anaa sa pagpaubos.

Kita usab adunay bug-at nga palas-anon, sumala sa sulat ngadto sa mga Taga-Efeso. Dinhi gihisgotan nga gibindisyonan kita sa Dios sa “tanang espirituhanong gasa ngadto sa kalangitan” usa pa gitukod ang kalibotan. Ingon ani kita ka pinangga sa Ginoo. Kon buot hunahunaon, bug-at ning espirituhanong gasa kay dako pod ang atong tulobagon sa Dios mahitungod sa paggamit niini. Dakog tulobagon ang piniyalan. Apan ang mapaubsanong piniyalan walay angay kahadlokan. Mapas-an ra ni niya kay pasalamat ug pagdayeg man sa Dios ang iyang malitok kon mahisgotan kining espirituhanong gasa.

Karong adlawa mao ang katapusang kasaulogan sa Sinulog. Ang sulog sa Diosnong gugma makasulod lamang sa mga kasingkasing nga mapaubsanon. Ang mga pulong sa akong Protestanteng higala usa ka damgo nga matuman kon kita magpaubos ug motampo sa atong mga katungdanan isip mga lungsuranon nga tinukmod sa ilang Kristohanong pagtuo.

Andam ba kita nga malakip sa sulog sa kabag-ohan sa atong nasod ug Simbahan?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph