GIBISITA sa inter-agency nga giumol sa Philippine Drug Enforcement Agency 7 ang mga bar sa General Maxilom ave. sa uptown area sa Dakbayan sa Sugbo niadtong Biyernes sa gabii, Enero 17, 2020.
Kini nunot sa kasaulogan sa Sinulog 2020. Kauban sa PDEA 7 ang Bureau of Fire Protection (BFP) ,Philippine National Police (PNP) ug Department of Labor and Employment (DOLE) 7.
Ang dapit maoy una nilang girumbo kay dunay daghang bars.
Ang pagsusi molungtad hangtud na nga matapos ang mga kalihukan sa Sinulog Festival nga gitumong aron malikayan nga dunay mga kagubot.
Matod ni A1 Dave Davila sa PDEA 7 nga ang paghiusa sa mga ahensiya ilabi na sa ilang buhatan mao nga mapakgang kadtong mga tawo nga dunay dautang tuyo. Tumong usab nila nga masanta ang pagkatap sa ecstasy, usa ka matang sa party drugs.
Karong tuiga mas gipahugtan karon ang ilang monitoring.
“Ang ato lang gyud gihimo sa pagkakaron mao ang pagpaabot sa mensahe sa atong mga kaigsuonan,Mura gihapon og information dessimination sa katawhan,”matod ni Davila.
Dako usab ang pasalamat sa grupo sa maayong pagtagad sa mga nagduma sa mga imnanan tungod kay mikooperar usab sa ilang pag-abot. (BBT)