SUPERBALITA CEBU

‘Nagpatuong dealer’ og sakyanan na-entrap

GINANG nga giingong nagpatuo nga dealer og sakyanan nadakpan sa entrapment operation sa Regional Intelligence Division (RID) ug Regional Special Operations Group (RSOG) 7 niadtong Huwebes sa gabii, Enero 16, 2020.

Nasikop sa kapulisan ang suspek nga si Chanelyn Asingua Almacen, 32, kasamtangang nagpuyo sa Corinthians subdivision, Barangay Basak, Dakbayan sa Lapu-Lapu.

Gipangulohan ni Police Lt. Col. Robert Lingbawan, pangu sa RID 7, nga niresulta na sa pagkasikop ni Almacen, asawa sa usa ka kanhi pulis.

Si Police Capt. Romeo Caacoy Jr., team leader, nibutyag sa Superbalita Cebu nga ilang na-entrap si Almacen pasado alas 10 sa gabii sa Tamiya, Barangay Basak, Siyudad sa Lapu-Lapu sa entrapment operation.

Ilang gipahigayon ang operasyon human sila makadawat og mga reklamo gikan sa 10 ka tawo nga giingong mga biktima ni Almacen.

“Daghan-daghan na gyud ang ming ari sa opisina ug ang among gikakurat gyud nga gawas niining mga reklamante, duna pay pipia ka mga nabiktima si Almacen nga wala pa makaduol,” matod ni Caacoy.

Lima ka mga biktima ni Almacen ningdangop kanila hinungdan nga gipahigayon ang entrapment operation.

MODUS

Dugang ni Caacoy nga si Almacen magpatuong dealer og mga sakyanan. Iya kining pangayoan og kwarta kunohay isip downpayment, depende sa klase.

Iyang patuohon ang biktima nga ang downpayment silbe usab nga bayad sa iyang hikayon nga mga papelis sa sakyanan nga napalit.

Uwahi nang makaamgo ang biktima nga way sakyanan ug di tinuod ang gipanulti ni Almacen, dugang ni Caacoy.

Si Dave (di tinuod niyang ngan), 32, niingon nga ang iyang negusyo rent-a-car.

Matod ni Dave nga gitanyagan siya ni Almacen nga duna siyay baligya nga mga sakyanan nga kompleto na sa papeles isip rehistrado sa usa lehitimo nga franchise.

Unang gibayad ni Dave ang P20,000, katunga sa iyang pasiunang bayad aron madali sa pag-asikaso nga mabalhin ang ngan sa mga sakyanan gikan sa orihinal nga tag-iya ngadto sa iyang pangalan.

“Usa sa akong gikalipay, Sir, nga siya pa mismo ang mitanyag nga siya na lang ang mobayad una sa dugang P20,000 ug tuboan lang og 7% aron didto na ko sa iyaha kuno mohatag sa kulang tungod sa kulang sa akong badyet. At least, nga bahala og dunay tubo total ug naa na ang sakyanan, mabawi ra man nako,” asoy ni Dave.

Niadtong Lunes, Enero 13, siya nibayad sa iyang P20,000, apan uwahi nang nahibaw-an nga nabiktima siya human sultihi sa iyang higala.

Ang ikaduhang biktima mao si Marvin Godines, kinsa silingan ug kumpare ni Almacen.

Si Godines niingon nga nibayad siya og P80,000 niadto lang Disyembre sa milabay nga tuig.

Matod ni Godinez nga nibayad siya sa sakyanan nga napilian aron mabalhin ang rehistro sa iyang ngalan.

“Ako nagduda na ko sa una pa. Apan wala nako to bali baliha kay lage kumare nako siya, kumpare ko niya tungod kay ang iyang anak akong kinugos. Apan wala ko magtuo nga giilad man pud diay gihapon ko,”matod ni Godinez.

P1M

Ang labing pait og nasinati ang usa ka maestra nga taga lungsod sa Bilar, Bohol.

Moabot sa og P1.3 milyones ang giingong iyang nahatag ngadto kang Almacen.

Ang maestra nihangyo usab nga di nganlan. (BBT)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph