SUPERBALITA CEBU

UV kampeyon sa Sinulog sa Airport

SA ikaupat nga tuig, ang University of the Visayas Cheer Dance Team mao ang nigawas nga kampeyon sa gipahigayong Sinulog sa Airport sa Mactan Cebu International Airport (MCIA) niadtong Biyernes, Enero 17, 2020.

Moabot sa pito ka mga dancing contingent ang misalmot sa naasoyng kompetisyon karong tuiga. Gilangkuban kini sa nagkadaiyang mga tunghaan ug dance groups dinhi sa Sugbo.

Kini mao ang Carcar Central National High School, Gun-ob National High School, Indiana Aerospace University, Nemesian Dance Theater, Tingo National High, Philippine State College of Aeronautics (PHILSCA), Sta. Rosa National High School, Senior High Dance Troupe ug University of the Visayas Cheer Dance Team.

Ang kalihukan gipasiugdahan sa kadagkuan sa GMR Megawide Cebu Airport Corporation (GMCAC) nga maoy nagdumala sa tugpahanan.

Matod ni Avigael Ratcliffe, corporate communications Jr. manager sa GMCAC, nga ang uban sa mga dancing contingent nakasalmot na sa ilang nangaging Sinulog sa Airport.

Ang kalihukan mao ang paghatag og engrandeng pagsugat sa mga dumuduong sa Sugbo nga moagi sa tugpahanan.

Usa usab kini ka paagi nga mapabati sa tugpahanan ang Sinulog fever sa Sugbo.

Sa wa pa ang ritual showdown, gipahigayon ang street dancing sa tanang contingents nga migikan sa departure area sa Terminal 1, mipaingon sa arrival area sa Terminal 2 ug mitapos sa Airport Village sa Terminal 1 diin gipahigayon ang ritual showdown.

“Ang nidagdag ani ang mga schools. So, karon naa tay pito ka contingents and yes naa silay mga festival queen kay atong awardan ang best in street dancing, best in ritual showdown ug best in festival queen,” matod ni Ratcliffe.

Gilangkat sa University of the Visayas Cheer Dance Team ang kampeyonato sa ritual showdown nga nagtangag og P100,000 nga ganti samtang ang ikaduhang pwesto nakuha sa Nemesian Dance Theater nga nagtangag og P75,000 nga ganti.

Ang ikatulong pwesto nakuha sa Carcar National High School nga nagtangag og P50,000 nga ganti.

Gawas sa kampyonato, nakuha usab sa University of the Visaya Cheer Dance Team ang best in festival queen ug best in street dancing.

Gawas sa Sinulog, nang-apod-apod usab ang GMCAC og mga Sinulog kit sa mga turista ug dumoduong nga ilang magamit sa Sinulog Grand Parade karong Dominggo.

Kini naglakip sa Sinulog T-shirt, bottled water, biscuits, whistle ig ang official Sinulog 2020 guide gikan sa Cebu City Sinulog Governing Board ug Sinulog Foundation Inc. (GCM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph