3 million miprosesyon

MAS DAGHAN: Itandi sa miaging tuig nga 90 ra ka mga sakyanan sa dagat ang mingsalmot, ang fluvial procession sa Sabado sa buntag, Enero 18, 2020, giapilan sa 170 ka mga barko ug baruto. Mas mubo hinuon ang rota. Estorya sa pahina 2. (Alan Tangcawan)
MAS DAGHAN: Itandi sa miaging tuig nga 90 ra ka mga sakyanan sa dagat ang mingsalmot, ang fluvial procession sa Sabado sa buntag, Enero 18, 2020, giapilan sa 170 ka mga barko ug baruto. Mas mubo hinuon ang rota. Estorya sa pahina 2. (Alan Tangcawan)

GIBANA-BANANG 2.5 million ngadto sa 3 million ka mga debotong Katoliko ningsalmot sa solemn procession gikan sa Basilica Menore del Santo Niño.

Tungod gihapon sa kataas sa panon sa mga deboto, nag-abot ang ulohan ug ikog sa prosesyon.

Wa baliha sa mga tawo ang kainit sa adlaw sa dihang gisugdan ang prosesyon, dunay mga debotong dala pa ang nagkadaiyang gidak-on sa mga imahen ni Sr. Santo Niño.

Matod ni Cebu City Police Office (CCPO) officer-in-charge Police Colonel Engelbert Soriano nga wa sila makadawat og report nga adunay insidente nga nahitabo atol sa relehiyusong kalihukan gawas lang sa pipila nga gitabang sa medical team tungod kay nangalipong tungod sa kahuot ug kainit sa panahon.

Giangkon ni Soriano nga tungod kay una niya kining pagdumala sa usa sa labing dako nga kalihukan sa nasud, siya nakulbaan sa pagpatuman sa siguridad hinungdan nga nangunay na siya sa pag supervise sa iyang mga sakop. Iyang gihulagway nga malinawon ra sa kinatibuk-an ang foot procession, gikan sa sinugdanan hangtod nga nabalik sa Basilica ang imahen ni Senior Santo Nino.

Sa dihang nakita ni Colonel Soriano nga nagdasok na ang mga tawo sa kilid sa ruta sa prosesyon, iyang gitugotan nga makaagi sa mga skywalk aron di makamugnag stampede.

Apan hugot niyang gidili ang pagpundo sa ibabaw tungod sa posibilidad nga adunay matagak nga butang paingon sa karsada.

“Pinayagan ko sila na makadaan pero crossing lang sa skywalk walang mag standby sa taas para hindi na umikot yung tao tapos pag may mag standby na kase tapos may dumaan na crowd baka may mahulog,” matod ni Soriano.

Iyang gihulagway nga nakatabang sa pagpatuman sa siguridad ang pagpawong sa cell sites.

Matod niya nga sukad sa shutdown sa Sabado sa kaadlawon, wa pa siya makadawat og reklamo labot niini.

“Sa signal shutdown, so far, wala naman tayong nadinig na negative impact,” dugang niya.

Bisan kon way signal sa cellphone, apan aduna silay gihimong text blast messaging alert system nga mahimong madawat sa mga adunay cellular phone sulod sa 5-kilometer radius.

Wa na siya motug-an kon giunsa kini nila, apan importante kini aron matabangan ang publiko pagbantay sa palibot nga maoy buhaton nila karong adlawa sa grand parade.

Samtang miabot usab ngadto sa 42,830 ka mga tawo ang nisalmot sa fluvial procession sa Sabado sa buntag nga gihulagway usab sa Philippine Coast Guard nga malinawon.

MUBO, DAGHAN

Mas nimubo man tuod ang rota sa fluvial procession ning tuiga, apan mas daghan usab ang nisalmot, napahigayon nga solemne ug malampuson.

Ang 178 sa 179 ka mga sakyanang pandagat nga nakaparehistro nga moapil ang nakalawig human na-late ang usa ug wa na gipasulod pa agig pagtuman sa ilang nasabutan sa pipila ka mga briefing.

Apan ang maong ihap sa mga barko ug motorbanca nga nisalmot halos doble ang gidaghanon itandi sa miaging nga naa lang sa 90.

Gitug-an ni Lieutenant Junior Grade Michael John Encina, tigpamaba sa Philippine Coast Guard Central Visayas (PCG-7), nga strikto nila nga gipatuman ang nasabutan pagsiguro nga way mahitabong disgrasya.

Gisirad-an ang south ug north channel gikan sa mga sakyanang pandagat alas 4 sa kaadlawon, duha ka oras sa wala pa sugdi ang fluvial procession.

Matod ni Encina nga daghan sa mga motorbanca nga di rehistrado nisuway unta nga maka-apil gikan sa may south channel gidid-an.

“No any untoward maritime-related incident was reported during the course of the fluvial procession. Nakapagsimula tayo on time, though meron tayong ilang assessment na it’s not according to the original plan. Nonetheless yung ating mga major goals has been met at nairaos natin na safe yung fluvial,” saysay ni Encina human dayon sa fluvial.

Gipasabot ni Encina nga ang wa nasunod, mao nga imbes ang galleon ra nga giluwanan sa mga imahen sa Birhen sa Guadalupe ug sa Sr. Sto. Niño, nga mao ang LCT Teofilo Camomot ang mag-una gyud unta sa fluvial, dunay nisingit ug adunay mouna pa sa galleon.

Hinuon adunay 400 ka mga sakop sa PCG security force ug maritime sector ang dali usab nga nakabuyag, ug nipasunod kanila sa han-ay.

“Yung dapat ang galleon ang nauuna, may iba na sumingit, at the same time yung iba ay hindi sumunod sa instruction and pronouncement natin sa designated channel. Pero andun naman yung ating security force and maritime sector to provide necessary assistance and move with regards to these mga hindi planned action,” dugang ni Encina.

Base sa natala sa PCG-7, alas 6:05 sa buntag hingpit nga nasugdan ang prosesyon gikan sa Captain Veloso Port sa Lapu-lapu City ug alas 7:50 sa buntag na nakadunggo sa Pier Uno sa dakbayan sa Sugbo.

Matod ni Encina nga bisan kon daghan ang nisalmot mas mubo man usab ang rota, human nga wala na nilahus pa sa atubangan sa Pasil Fish Port isip kabahin sa seguridad tungod sa nagpadayon nga pagpatukod sa Cebu Cordova Link Expressway, sa ikatulo nag taytayan nga magdugtong sa Cebu City ug lungsod sa Cordova.

Aron masunod ang dul-an sa duha ka oras nga prosesyon, mas gipahinayan pa ang dagan sa galleon, gikan sa naandan unta nga 5-7 knots ngadto nalang sa 3 knots.

Gawas sa gatusan ka mga sakyanang pandagat nga colorful nga gidaydayanan ug anaay mga nanagsinulog nga mga sakay niini, libuan ka mga deboto nga diha sa baybayon sa syudad sa Lapu-lapu City, dakbayan sa Mandaue ug sa mga pantalan hangtud na sa Siyudad sa Sugbo ang nag-atang sa pag-agi sa galleon, dungan sa ilang pagkaway-kaway sa mga kamot tumong ngadto sa imahe sa Balaang Bata.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph