DIGOS CITY -- Nanawagan ang Department of Health (DOH)-Davao Region ngadto sa mga ginikanan nga mosalmot sa measles immunization campaign ning rehiyon sa pagsugod niini karong Lunes, Enero 20.
Gibutyag ni Dr. Annabelle Yumang, DOH-Davao director, nga nagpaguwa na sila og immunization advisory human natala ang 1,754 ka mga kaso sa measles niadtong tuig 2019.
Gumikan niini, gimandoan sa DOH ang tanang opisyal sa mga lokal nga buhatan sa panglawas nga sigurohong mabakunahan ang mga batang wa makaapil niini sa miaging tuig.
Gitahasan sab ni Yumang ang mga otoridad sa panglawas nga kinahanglang maapil ang mga bata sa kabarangayan ilabi pa kadtong nagpuyo sa kabukiran.
Subay sa datos sa DOH, nakatala ang Davao City sa pinakataas nga kaso diin miihap sa 683 ug 13 ang namatay; Davao del Norte 395 kaso ug lima ang namatay; ug Davao de Oro 235 kaso diin duha ang namatay.
Sa Davao Oriental, natala ang has 289 kaso apan wa’y namatay; Davao del Sur 127 ug Davao Occidental 25 kaso ug pulos wa’y namatay.
Miguwa sa health advisory, nga sagad sa matakbuyan sa measles mao kadtong mga batang nag-edad usa ka tuig paubos diin anaa sa 35 porsyento samtang ang 20 porsyento mao ang mga nag-edad og 1-4 ka tuig.
Nasuta sab nga wa maapil sa mga pag-bakuna ang mataptan og measles hinungdan nga moabot sa 90 porsyento ang mga namatay sa mga nag-edad og 5-anyos paubos. (Orlando B. Dinoy)