BANSALAN, Davao del Sur -- Daghang pamilya ang miduyog sa kapistahan ni Senyor Santo Niño kagahapong adlawa, Enero 19, nga mao sab ang adlaw sa kapistahan niini didto sa siyudad sa Sugbo.
Sayo pa misimba na si Marcelyn Manos Dominggo sa buntag, Enero 19, nagbitbit niini ang imahe sa Santo Niño aron pa-benditahan sa pari.
Gibutyag sab niini nga aduna’y dyutay’ng salu-salo sa ilang balay kauban ang pamilya.
Sa Brgy. Poblacion Dos, gisaulog sab sa pamilyang Razonable ang kapistahan sa batang Hesus.
Sumala ni Cecelia, 37, nga kini mao ang adlaw nga magtapok silang pamilya ug mga kabanay.
Nahimo ng tradisyon sa ilang pamilya ang pagsaulog sa adlaw sa Santo Niño diin sumala pa daghan ng hinabang ang gipabuhagay ilabi pa sa ilang dyutay’ng negosyo.
Ang ubang deboto, nagdagkot og kandila ug mihalad og bulak sa Santo Niño kay alang nila kini ang pamaagi aron makapasalamat sa Santo Niño sa daghang grasya nga gipadagayday niini ngadto sa ilang panimalay.
Samtang, ang deboto nga si Belen Alcaria, nagbutyag nga ang Santo Niño maoy nakaayo sa iyang hubak nga iya ng gidala-dala sukad sa iyang pagkabata. (Orlando B. Dinoy)