ANAA sa mga 10 ngadto ka 15 ka mga kaso sa emerhensiya ang marespondehan sa City Risk Reduction Management Department (CDRRMD) matag adlaw.
Giingong sagad niini nalambigit ang vehicular accident labi motorsiklo ug lango sa ilimnong makahubog ang nagmaneho rason nga ila na kining gitutokan uban sa ubang mga ahensya.
Gidugang pa niini nga ang emergency cases apil niini ang medical cases ug trauma diin pasabot sa medical sama sa nagsakit, lisod og ginhawa ug uban pa samtang ang trauma mao ang nahulog, nadunggaban, vehicular accident, gibunalan ug uban pa.
Gibutyag ni Nick Jabagat, tsirman sa CDRRMD nga daghan gyud ang vehicular accident nga ilang marespondehan.
“Karon ang emergency mga 10-15 siguro, pero so far pinakadaghang ma respondehan mao gyud na siya number one mga vehicular accidents,” matud ni Jabagat.
Gidugang pa nga balantayunon ang adlaw nga Biyernes ug Sabado ug panahon sa tingsweldo ilabi na nga panahon usab kini sa uban nga maglingaw-lingaw.
Nagpahimangno kini sa mga motorista nga kung makainom dili na magmaneho tungod kay daghan usab ang aksidente nga ilang narespondehan nga posibleng nakatulog ang drayber.
“Dili gyud ma zero ang under the influence of liquor, expect namo na Friday ug Saturday, apil nay ting sweldo ug kana usahay ulan-ulan ginagmay ang kalsada bantayunon gyud na diha,” matud ni Jabagat.