PITO ka mga sakop New People’s Army (NPA) diin duha kanila mga dagko og posisyon ang boluntaryong mibalik sa sabakan sa gobyerno butang nga dako og kawad-on sa walhong grupo.
Gipresentar kini sila niadtong Huwebes sa Enero 16, kung asa gihimo ang localized peace engagement gipangunahan nila ni Valencia City Mayor Azucena Huervas, 4th Infantry Division Commander Major General Nemesio Gacal; 403rd Brigadier Commander Edgardo De Leon; 88th Infantry Battalion Lt. Colonel Franklin Fabic; NICA-Northern Mindanao director Emmanuel Ordoña; Bukidnon provincial director Roel Lami-ing; Valencia City police chief Surki Sereñas; 403rd Brigade Captain Ryan Layug, ug uban pa nga mga personalidad.
Ang mga walhong grupo nga mipakita gyod sa ilang nawong ug dili na magpa-blurred sakop sa Guerella Front 6 kung diin si Roselyn Pardo alyas Jamby ang GF6 Front Secretary ug kapikas nga si Reynante Tumbalang alyas Jigger ug War nga GF6 Commander ug laing lima ka mga kauban.
Matud sa magtiayon nga sila mismo ang niboluntaryo sa pagkanaog gumikan sa kakapoy ug panghuna huna nga walay katapusan nga kakapoy sa pakigiyera. Nabati sab nila nga wala nay suporta kanila ang masa.
“Nakigiyera mi para unta sa katawhan pero nakahuna huna mi nga unsaon paman namo sa pakigiyera, wala gihapon mi kapaingnan nga ang katawhan naman mismo wala nay suporta kanamo, daghan na sila nagdeklarar kanamo og persona non grata,” kini ang rason ni Jamby nganong nakahukom nga mosurender ug midoul sa local nga kagamhanan sa Valencia City.
Dugang niini nga nasayod siya sa mga pasikot sikot ug pagdumala sa walhong grupo ug ilang giangkon nga ang ilang pagsurender dako og kawad-on sa NPA. “Sigurado ko nakapaniang kanila,” tubag ni Jigger. Sa dugay sab nga katuigan nga isip sakop ug miyembro sa walhong grupo niagi na angp ila ka mga presidente apan ilang gihulagway nga si Presidente Rodrigo Duterte lamang ang adunay ngipon.
“Si Presidente lamang sa tanang presidente ang dunay ngipon, gusto gyod niya nga magmalinawon atong nasod ug daghan iyang programa nga gilain alang kanamo nga mobalik sa gobyerno,” sulti ni Jamby.
Gitubag usab nila ang pangutana nga kalabot sa giingong ang tinoud nga mga NPA dili manurender. “Akong masulti nga tagsa tagsa kita og desisyon ug kana ang among gipanumpaan mahanaw kana kay dili matugkad ang desisyon sa usa ka tao,” sulti ni Jigger, mihilak sab kini og nangayo og pasaylo sa giangkon niining napatay kaniadto.
Sa pagkakaron ang pito protektado sa International Humanitarian Law ug usa sab sa rason nga gipakita ang ilang nawong kay protektado na sila karong mga panahona.
Sa iyang bahin ni Major General Gacal iyang gikalipay ang pagpanurender ug malaumon nga mosunod na ang uban walhong grupo sa pagsurender aron tukmang kalinaw maangkon sa pulo sa Mindanao.