DUHA ka mga driver ang nakabsan sa kinabuhi sa managlahing insidente kung diin ilang mga motorsiklo nahulog sa kanal sa area sa Bukidnon.
Unang insidente natigayon adlaw’ng Huwebes, Enero 16, mga alas 2:10 sa kadlawon sa Diversion Road, Purok-4, Sta Cruz, Poblacion, Valencia City, Bukidnon.
Gimaneho kini ni Joseph H. Maravelles, 46, ulitawo, residente sa Sugarland, Lumbo, susamang siyudad.
Sa imbestigasyon sa Valencia City Police Office nasuta nga ang maong motorsiklo pabiyahe gikan sa South paingon Norte nga direksyon dihang nahulog kini sa kurbada nga bahin ug milahos sa kanal. Nayagyag ang motorsiklo ug dili sab tiaw ang kadaot nga bun-og, pangos nga naangkon sa biktima sa nagkadaiyang bahin sa iyang lawas hinungdan dihang gidala sa Laviña General Hospital apan gideklarar kining patay.
Ikaduhang aksidente natigayon sa Purok-5, Barangay-San Martin, Malaybalay City, Bukidnon kung diin ang usa ka unit sa motorsiklo kolor itom nga gimaneho ni Bernabe M. Simbo, 51, minyo, usa ka habal habal driver, residente sa P-1, Linabo, Malaybalay City, Bukidnon ang aksidente nahulog sa irrigation canal sa dapit.
Gikan sa weste paingon sa este ang direksyon ni Simbo apan pag-abot sa kurbada nga bahin ang motorsiklo nahulo sa kanal.
Matud sa residente sa dapit nga si Isaias Ramos nga mga alas 12 sa kadlawon niadtong Enero 16 aduna siyay nadungog nga kusog nga labugsaw sa tubig apan wala lang gitagad.
Niadtong Enero 14, ang biktima namatikdan nga nakig-inom uban ang iyang paryente. Niadtong Enero 16 sa alas 7:50 sa buntag nadiskubre ang patayng lawas sa biktima nga anaa pa sa kanal uban ang iyang motorsiklo.
Si Police Colonel Roel Lami-ing ang Provincial Director sa Bukidnon Police Office kanunay nagpahimangno sa mga motorista nga mag amping labina sa pagmaneho ug dili sab magmaneho nga hubog aron malikayan ang disgrasya.