GIKONSIDERANG mga high-value target nga dako og kasupakan sa Republic Act 9165 kon Dangerous Drugs Act ang nadakpan sa sunod-sunod nga drug operation sa kapolisan sa Misamis Oriental Provincial Police Office.
Mga alas 9:30 sa gabii niadtong niaging mga adlaw sa pangpanguna nila ni Lugait Police Station chief Police Lieutenant Nilo Capillo uban ang Regional Drug Enforcement Unit 10 sa pagpanguna ni Police Lieutenant Colonel Esperidion Biado II malampuson nga nadakpan sa drug bust operation ang numero unong high-value target sa Lugait nga giilang si Dennis Sismar Bacatan, 49, minyo, taga Poblacion, susamang lungsod ug usa ka municipal councilor sa dapit.
Gikonsidera sab kini nga naa sa listahan sa intelligence.
Ang operasyon gihimo pinasikad sa search warrant nga giisyu ni presiding judge Renato T. Arroyo sa 10th Judicial Region, Manticao, Misamis Oriental niadtong Enero 15, 2020.
Narekober gikan sa suspetsado ang 15 gramos sa gitouhang shabu nga gibana-banang mobalor og P100,000.00; cash nga P12,000.00; itom nga pitaka, upat ka mga cellular phones, ug granada nga maayo na lamang wala sab kini nagpakita sa pagsukol.
Ikaduhang operasyon gipahigayon niadtong Biyernes sa hapon Enero 17 mga alas 4:45 sa hapon sa hiniudang pwersa sa Regional Drugs Enforcement Unit 10 (RDEU) pagpangunan ni Police Major Allan Oniana uban ang personahe sa Medina Municipal Police Station.
Milampos ang kapolisan sa drug buy bust operation nga miresulta sa pagkasikop ni Kristoffer Exzur P. Barcelona, 40, usa ka businessman ug residente sa Purok 5 Brgy South Poblacion, Medina, Misamis Oriental.
Napalit gikan sa suspek ang usa ka pakete sa gitouhang shabu nga mobalor og P1,000.
Atol sab sa body search niini nakuha ang lima ka laing pakete nga gibanabanang motimbang og 25 gramo nga adunay street value nga P170,000.
Nasuta nga gi-surveillance na kining dinakpan sulod sa duha ka bulan ug karon nga katransaksyon niini ang operating units milampos sa pagsikop niini.
Mga dinakpan pulos detinado na karon sa duha ka mga municipal police station.