BUOT ni Congressman Rolando Klarex Uy nga ang anak nga kasamtanang bise mayor ang mohulip kaniya sa pangatungdanan isip kongresista sa unang distrito sa dakbayan sa Cagayan de Oro.
Gibutyag ni Klarex atol sa pag-turnover sa lima ka mga proyekto sa Barangay Kauswagan ug Barangay Bonbon niadtong Enero 17 nga gi-endorso niya ang anak tungod kay buot niini nga maoy motapos sa iyang mga proyekto ug mopadayon sa mga proyekto alang sa katawhan sa distrito uno.
“Yes tinuod na di nako na i-deny kay ang tuyo nako nga ang akong mga proyekto sa distrito uno nga wala pa mahuman, akong ipatiwas sa iya, ang mga plano nga wala pa ma-implementar mahimo niyang ma implementar,” matud ni Uy.
Gidugang pa niini nga kung ang anak nga si bise mayor Rainier Joaquin ‘Kikang’ Uy ang mohulip kaniya sayon ug dali lang kining maduolan ug masultian ug labaw sa tanan giingong nasulayan na kini sa iyang kaligdong ug masaligan usab sa pagpanerbisyo ug pagpangatungdanan.
Gikabutyag pa usab niini nga isip amahan dili na kini makabalibad ug kung ugaling kini mobalibad iya kining hangyuon tungod kay giingong dili niini buot nga mapasagdan ang katawhan labi na sa ilang mga personal nga panginahanglanon.
“Isip akoy amahan di na na kabalibad kung mobalibad siya hangyuon nako siya ug dalang pagpasabot nga gikinahanglan gyud ka sa katawhan aron ang akong mga proyekto nga wala pa mahuman ug akong mga laraw para sa distrito uno,” dugang niini.
Giklaro usab niini nga wala pa niini gidawat ang pag-endorso ni Mayor Oscar Moreno kaniya sa pagpapili sa pagka mayor karong umaabot nga eleksiyon tuig 2022.