HUMAN nila nalabni og balik ang titulo sa Philippine Basketball Association (PBA) Governor’s Cup, ang Brgy. Ginebra Gin Kings nakatutok na dayon sa usa ka malisod nga misyon – pakgangon ang dominasyon sa San Miguel Beermen sa Philippine Cup nga gitawag sab og All-Filipino conference.
Kapin na sab sa usa ka dekada nga wala nakatilaw og kampiyunato ang Gin Kings sa All-Filipino. Katapusang nakatilaw ang Gin Kings og korona sa All-Filipino niadto pang 2007 diin ilang gipukan ang Beermen sulod sa unom ka mga duwa sa finals series.
Niadtong higayuna, si coach Jong Uichico pa maoy naggiya sa Gin Kings.
“We are certainly going to go for it,” matod sa kasamtangang coach sa Gin Kings nga si Tim Cone, kinsa gipahimangnuan dayon ni LA Tenorio kabahin sa All-Filipino title. “LA came up to me and said, ‘We got to win in the all-Filipino. I haven’t won an all-Filipino yet.’ I think he is going to get everyone keyed up to win,” matod ni Cone.
Nagtuo si Cone nga mas aduna sila’y kapabilidad nga pusgayon ang gingharian sa Beermen sa All-Filipino sa paghiabot ni Stanley Pringle sa ilang tugkaran.
“We feel like we have the tools. We are going to have a substantial break so we will be able to kinda recharge our batteries and get keyed up for the all-Filipino,” dugang ni Cone.
“Stanley’s there as an anchor for the team. Japeth [Aguilar] and Greg [Slaughter], they kinda take a step back usually when the imports come but it’s their time to step forward.”
Ang Beermen mao ang naghari sa All-Filipino sa miaging lima ka mga tuig.
Giangkon ni Cone nga lisod ang pagbuntog sa Beermen sa All-Filipino gumikan sa presensya sa Sugboanong higante nga si JuneMar Fajardo apan nagtuo ang multi-titled coach nga masugakod ra nila ang Beermen ning higayuna. (ESL)