PAKYAS si Olympian Mary Joy Tabal sa pagsakmit og medalya sa 2018 Asian Games women’s full marathon event kagahapon sa Gelora Bung Karno stadium sa Jakarta, Indonesia.
Si Tabal, kinsa lumad nga taga Brgy. Guba, Cebu City, igo lang nahiluna sa ika-11 nga dapit pinaagi sa oras nga 2:51:41.
Hinuon bisan pa niini, ang 2017 Southeast Asian Games nipadayag sa interbyu sa ABS-CBN nga malipayon gihapon siya sa iyang naabot.
Sa tanang runners gikan sa Southeast Asia, ang produkto sa Southwestern University (SWU) maoy nag-una.
Nagkanayon si Tabal nga wala siya nagdahom nga makuha niya ang iyang personal best gumikan sa kainit sa panahon.
Human sa lumba, nag-post si Tabal sa iyang Facebook account og mensahe nga nagpadayag sa iyang paghangop sa kapakyasan. “For the love of the country, thank you! No excuses!” mensahe ni Tabal.
Ang naturalize runner sa Bahrain nga si Rose Chelimo maoy nakakuha sa gold medal pinaagi sa oras nga 2:34:51. Mao kini ang labing unang gold medal sa Bahrain.
Sa laing bahin, nakadugang og bronze medal sila si Dines Dumaan ug Jefferson Rhey Loon sa Pilipinas human sila napakyas sila sa ilang semi-finals nga tahas sa pencak silat kagahapon.
Si Dumaan nalupig ni Muhammad Faizal M Nasir sa Malaysia, 5-0, sa men’s Class D bout 50-55 kilograms category samtang si Loon gipilde ni Nguyen Ngoc Toan sa Vietnam, 5-0 sab, sa men’s Class D bout 60-65 kilograms division.
Ang Pilipinas aduna na’y 10 ka mga medalya sa matag upat ka mga tuig nga kompetisyon, usa ka gold ug siyam ka mga bronze. (ESL)