MOABOT sa dul-an sa P1.3 milyunes ang balor sa shabu nga nasakmit sa kapulisan sa siyudad sa Talisay.
Kini gikan sa tulo ka managlahi nga buy bust sa Sitio Laray, Barangay San Roque, Talisay niadtong Sabado sa gabii, Enero 18, diin tulo usab ka giila nga mga high value target nga mga durugista ang nangasikop.
Unang nasikop alas 7:30 sa gabii ug nasakmitan og 135 ka gramos nga shabu, nga mobalor sa P1,040,000 mao si Romero Del Puerto Dela Torre, 35, minyo ug taga Sitio Sawsawan, sa maong barangay.
Matod ni Police Major Gerard Ace Pelare, hepe sa Talisay City Police Station, nga sud sa pipila ka buwan na sila nakadawat og report kalabot sa pagpamaligya niini sa ilegal nga drugas sa barangay.
Dugang ni Pelare nga kauban niini nga lakip unta sa ilang subject sa operasyon ang usa ka Japet Abapo apan nakaeskapo kini.
Nakuha gikan kanila ang unom ka dagkong triangular nga pakete sa shabu ug laing usa ka medium pack sa shabu.
Human ang duha ka oras, nasikop usab dayon ang usa ka Aldrin Abapo Numeran, 41, residente sa sitio Laray, Barangay San Roque, Talisay City.
Nasakmit gikan kaniya ang duha ka medium pack, 21 ka gagmayng’ triangular nga pinakete sa gidudahan nga shabu.
Motimbang kini og 11.05 gramos nga mobalor sa P75, 140.
Sa alas 10 sa gabii, nadakpan ang usa ka Peter Cinco, 26, molupyo usab sa maong barangay.
Sila si Numeran ug Cinco ang giila usab nga HVT sa Barangay San Roque kinsa giingong namaligya og drugas sa uban pang barangay sa Talisay.
Nasakmit kang Cinco ang usa ka daku nga pakete sa shabu ug 21 ka gagmayng’ mga pinakete sa shabu nga mobalor tanan sa P174, 140.
Ning pagkasikop sa tulo nga giilang dagkong mamaligyaay og ginadili nga drugas sa San Roque, Talisay, nanghinaot ang Talisay Police nga mokunhod na ang suplay sa drugas sa maong barangay.
Ang maong tulo ka operasyon ang kabahin sa Oplan Limpyo Talisay nga gisugdan sa miagi pa nga tuig sa kapulisan. (FMD)