GISUSPENSO ni Mayor Edgardo Labella ang klase sa tanang ang-ang sa public schools karong adlawa, Enero 20.
Ang maong suspension of classes gipahibawo sa mayor aron dili na moadto sa mga tunghaan ang gatusan ka libo ka mga tinun-an, usa ka adlaw human sa Sinulog Grand Parade.
Ang mayor niingon nga adunay daghang kalihukan karong adlawa diin ang mga mananaog kagahapon sa lainlaing kategoriya mobalik og pasundayag sa Cebu City Sports Center.
Ang Cebu City busy pa sab sa pag-atiman sa mga turista ug daghang basura ang angayang kolektahon.
Dugang ni Labella nga gigamit usab sa mga delegasyon gikan sa lalawigan sa Sugbo ug kanait nga mga lalawigan ang mga ekswelahan isip billeting center.
Ang mga pribadong tunghaan aduna gihapoy klase apan kon ideklara sa ilang school administrator nga way klase, mahisama usab sila sa public schools.
Ang mga publikong tunghaan kinahanglan nga motapak og laing adlaw sa pagklase (Sabado) aron makumpleto ang ilang number of school days sa usa ka tuig.
Ang maong pahibawo gianunsyo ni Labella atubangan sa mga tigbalita nga gitambungan nilang City Administrator Floro Casas Jr., Konsehal Dave Tumulak, Public Information Officer Razel Cuizon, Sinulong Foundation Inc. Executive Director Jojo Labella ug City Attorney Rey Gealon.
Samtang, ang mga tunghaan nga pribado walay apil sa mando ni Labella, apan magdepende sa ilang administrador. (PAC)