GIBANABANA nga moabot ngadto sa dos milyunes lang ka mga tawo ang ningsaksi sa Sinulog grand parade kagapon, Enero 19.
Apan minus kini kaayo kon itandi sa 2019 nga niabot og 3.5 milyunes ang assessment sa mga nisaksi.
Matod ni Police Brigadier General Valeriano de Leon, direktor sa Police Regional Office (PRO) 7, nga sa iyang gihimong aerial survey gamit ang helicopter sa Special Action Force Air Unit kagahapon sa alas 3 sa hapon iyang nakita ang pagdasok sa daghang mga tawo sa dalan Osmeña boulevard lakip na ang dalan sa P. Del Rosario hangtod na sa General Maxilom Avenue.
Nakita sa heneral nga ang mga tawo gikan sa nagkalain-laing lugar sa nasod ug gawas sa Pilipinas gusto nga mosaksi sa grand parade sa dugay na nga panahon.
Walay nakitang problema ang kapulisan sa pagpatuman sa seguridad ug nakatabang niini ang pagpawong sa signal sa tanang telcos sa tibuok Metro Cebu.
Nabantayan usab sa heneral nga mikunhod ang petty crimes sukad pa niadtong solemn procession hangtod nga nahuman ang Sinulog grand parade.
Nagpasabot matod pa kini nga ang publiko misunod sa gipatuman nga programa sa PNP nga maoy hinungdan nasayod sila unsay angayan nga buhaton aron dili mabiktima sa mga kriminal.
Dako usab og natabang ang subsob nga kampanya sa kapulisan batok sa kriminalidad usa ka semana sa wala pa ang mga kalihukan sa Sinulog.
“Ang mga tawo they are following the security and marami na rin tayong mga awareness programs na mag ingat sa gamit yung iba di na nagdadala ng gamit at nanunuod lamang sila,” matod ni de Leon.
Adunay hugot nga seguridad gipatuman sa kapulisan sa Cebu City Sports Center diin sa pagsulod pa lang gipangrekisa na ang mga tawo tungod sa pagbisita ni President Rodrigo Duterte.
Apan bisan sa kaestrikto sa seguridad aduna pa gikapoy misuway pagpalusot og usa ka long neck nga bino nga gisakmit usab dayon sa mga pulis.
Lakip sa gipang-imbargo ang mga ballpen, kutsilyo, lighter ug sigarilyo.
Gipasalamatan ni General de Leon ang mga Sugboanon, deboto ug mga turista nga nisunod sa lagda nga gipatuman sa mga pulis aron lang mahatagan og malinawon nga Sinulog ang katawhan. (B)