MISAAD si Presidente Rodrigo Duterte nga motabang sa pagsulbad sa suliran sa grabe kahuot sa trapiko sa Metro Cebu pinaagi sa pagpangita og pundo alang sa railway project.
Iya kini gisulti atubangan sa liboan ka mga tawo nga nisaksi sa Sinulog Grand Parade 2020 sa Cebu City Sports Center (CCSC) niadtong Dominggo, Enero 19.
Atubangan sa mga Sugbuanon, apil ang mga opisyal sa kagamhanan sa lalawigan sa Sugbo ug siyudad sa Sugbo, matod ni Duterte, nga ang pagtukod og railway maoy labing maayo nga solusyon sa pagsulbad sa problema sa trapiko sa Metro Cebu.
Sigon sa Presidente dili na haom ang pagpalapad sa kadalanan labi na usa na ka karaan nga siyudad ang Sugbo.
“Wala pa atong gobyerno, naa na ang inyong dan. So when it became a city, mao nang naghuot mo...You cannot expand it anymore even if you’ll have mass transportation. So it’s either train, or a taas,” matod niya.
“Kinahanglan sundon na lang ninyo ang Manila... I suggest that you do it here. It’s either train just like Taiwan. Just a small train that runs across the city. Makasugod mo’g train. Ug naa na moy plano, idayon ninyo,” dason ni Duterte.
Sigon niini nga mangita siya og tinubdan sa salapi aron adunay magamit nga pundo alang sa railway project.
“We will help you find the sourcing of the road project,” niingon si Duterte, kinsa nidugang nga hayan mangutang siya og kwarta gikan sa China o ubang mga nasod.
Sa iyang pakigpulong, nipasidaan usab si Duterte sa mga Sugbuanon kabahin sa paglambigit sa ilang kaugalingon sa negosyo sa gidili nga drugas.
Matod niya, dili siya managana mopatay og mga drug lord o si bisan kinsa nga nalambigit sa illegal drug trade.
Sumala niini nga naghitak ang gidili nga drugas sa siyudad sa Talisay.
“Ang druga kusog kaayo sa Cebu. Ang Talisay, wala na nay pahuway. Naa ang tanan dihang kabuang. Hasta inyong mga deputy, directors, naa sa druga. Mao tong daghang gipangpatay diri nga chief of police,” pamulong ni Duterte. Dugang niya nga dili niya itugot nga gub-on sa illegal drugs ang nasod, “if you do, I will kill you...bisan pa’g Cebuano mo.”
Siya nipaambit nga nitambong siya sa Sinulog grand parade tungod kay gihigugma niya ang mga Sugbuanon.
“Gihigugma ta mong tanan. Kadugo man gyud ta. Ang akong pag-anhi kay muapil ko sa inyong kalipay. Gusto lang kong makakita ninyo,” dugang ni Duterte.
Iya usab gipasalamatan ang mga Sugbuanon sa ilang suporta ngadto kaniya atol sa kampanya diin nidaug siya sa pagka presidente sa miaging piniliay niadtong 2016.
“Midaog ko pagkapresidente tungod sa inyong makalilisang nga suporta,” pamulong niini.
Ang Presidente niabot sa CCSC alas 6:30 sa gabii aron mosaksi sa Sinulog. Duha ka presentasyon ang iyang nasaksihan, ang guest contingent sa Siloy Festival sa lungsod sa Alcoy diin nisayaw si Gobernador Gwendolyn Garcia kauban ang mga bokal, department heads, ug consultants sa Kapitolyo ug ang contingent sa Lumad Basakanon sa Barangay San Nicolas, siyudad sa Sugbo.
Tungod sa pagbisita ni Duterte, hugot nga seguridad ang gipatuman sa mga awtoridad sud sa CCSC ug dan nga yang giagian. (SunStar Philippines)