NALINGAW si Jennylyn Mercado nga nipaambit nga niluntad og kapin sa usa ka dekada ang iyang pagpaabot nga makapares og balik si Dingdong Dantes sa serye sa GMA Network.
“Nakakatuwa, ang tagal. I am so proud na makasama muli kay Dong,” matod ni Jen.
Pulong sa aktres sa press conference (presscon) sa Golden Cowrie, Salinas Drive, Barangay Lahug, dakbayan sa Sugbo niadtong Sabado, Enero 18, alang sa ‘Descendants of the Sun (DOTS)’ nga umaabot nga local adaptation gikan sa sikat nga Korean series.
Ang duha ulahing nagkapares sa fantaserye nga ‘Encantadia’ niadtong 2001.
Si Dong nagkanayon nga niabot ang laing tukmang panahon uban ni Jen ug nipadayag og kalipay nga ang proyekto gihatag kanila nga makahuluganon nga istorya sa mga pag-antos sa serbisyo sa mga sundalo alang sa nasod.
Wala pay tino nga petsa kanus-a kini magsugod sa telebisyon apan giklaro sa GMA nga makita na kini sugod sa Pebrero.
Gawas nila ni Jen ug Dong, nitambong sa presscon mao si Rocco Nacino, Lucho Ayala, Jon Lucas, Paul Salas, Prince Clemente, Andre Paras, Hailey Mendes, ug Chariz Solomon.
Ang DOTS team nihimo og Kapuso Mall Show sa Gaisano Island Mall sa Mactan sa alas 4:00 sa hapon ug Kapuso Fiesta sa Robinsons Galleria Cebu sa alas 6:00 sa gabii niadtong Sabado.
Samtang, sila si Dingdong, Jennylyn, Rocco, ug ubang cast sa DOTS nisakay sa float sa GMA Network sa Sinulog Grand Parade kagahapon, Enero 19.
“2020 is a very significant year for GMA Network since we are celebrating our 70th anniversary,” matod ni GMA Regional TV Vice President and Head Oliver Amoroso.
Si Dingdong nagkanayon nga loyal nila nga gisunod ang orihinal nga bersiyon sa Korean series apan gihatagan og Pinoy nga twist hunam dunay mga eksena nga dili pwedeng masunod sama sa pag-adto sa ubang nasod (North Korea).
Apan ang istorya sa gugma ug trabaho sa mga sundalo wala kini kalahian sa kasinatian sa mga Pinoy. (RRM)