SUPERBALITA CEBU

Editoryal: Sinulog gidumog

Editorial art by Ariel Itumay

BISAN sa daghang kontrobersiya ug bulilyaso sa pagpangandam sa Sinulog 2020, ang mga kalihokan sa Sinulog malampuson ug gidumog gihapon sa bagang duot sa mga deboto ug mga bisita nga lokal ug langyaw.

Duha ka bahin ang Sinulog: ang relihiyusong tulumaon nga gipangunahan sa Simbahan ug ang festival nga bahin nga gipangulohan sa kontrobersyal nga Sinulog Foundation, Inc. (SFI) ug lokal nga kagamhanan.

Ang Walk with Mary niadtong Biyernes, Enero 17; Seaborne (fluvial) Solemn Processions niadtong Sabado, Enero 18; ug Pontifical Mass niadtong Enero 19 gidumog sa daghang deboto nga nagkadako matag tuig.

Sa Sinulog Festival, alegre gihapon apan namatikdan nga medyo kini minos kon itande sa miaging tuig. Wala pa hinuoy opisyal nga pagbanabana atol ning pagsuwat.

Nakaapekto kaha ang kahigpit sa seguridad tungod sa presensiya ni Presidente Rodrigo Duterte? Sama sa naandan, ang naulahi kaayo sa iyang gikatada nga oras sa pag-abot.

Gani, ang ritual showdown gisuspenso una pasado alas 6:00 sa hapon aron pagpaabot sa presidente hinungdan sa dili malikayan ang pagbagulbol sa mga partisipante ug ubang nanan-aw sa Sinulog Grand Parade.

Naputol ang showdown dihang namulong pa si Mayor Edgardo Labella sa paghangop sa pag-abot sa presidente ug gipasundayag ang duha ka mga espisyal nga contingents.

Pagkahuman, si Duterte namulong na usab nga hinungdan nga dunay ubang tumatan-aw nawad-an og gana sa pasundayag, apan ang uban usab nalingaw sa pagkigpulong sa presidente nga nihubad sa iyang Iningles nga giya ngadto sa Binisya dihadiha.

Unang gitambongan ni Duterte nga kalihokan kagahapon mao ang pagsubo sa Mactan Cebu International Airport (MCIA) Teminal 1 o domestic terminal sa dakbayan sa Lapu-Lapu.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph