SUPERBALITA CEBU

Angkas pangdakpon

SunStar File

POSIBLE nga sugod sunod semana, mawagtangan og panginabuhian ang mga Angkas drivers sa Sugbo subay sa pag-undang sa technical working group (TWG) sa Department of Transportation (DOTr) sa pilot run niining motorcycle taxis.

Apan namahayag si Senator Bong Go nga iyang hangyuon si Presidente Rodrigo Duterte ug si DOTr Secretarary Arthur Tugade nga lugwayan ang pilot study, apan aduna’y mga kondisyon.

Sa tulo ka motortaxis nga nalakip sa pilot study, ang Angkas lang ang anaa sa Sugbo.

Ang Joyride ug Move It anaa lang sa Metro Manila nag-operate.

Matod ni Land Transportation Franchising and Regulatory Board (LTFRB) 7 Regional Director Eduardo Montealto Jr., nga 3,000 ka mga Angkas drivers ang namonitor nila nga nagdagan sa Sugbo. Kon hingpit na nga mapatuman ang paghulagway sa ahensiya nga “illegal” na kining motortaxi, panakpon na kini sa awtoridad.

Si TWG chairman Antonio Gardiola Jr., nisumiter sa rekomendasyon sa TWG pag-undang sa implementasyon sa pilot study kang Tugade niadtong Enero 17.

Ang Inter-Agency TWG nihimo og unom ka buwan nga pagtuon sa motortaxis niadtong Hunyo 25 hangtod Disyembre 25 apan gilugwayan kini og laing tulo ka buwan ug unta mahuman karong Marso 23 pa.

Mismo si Montealto nihulagway nga dili luwas kining motorsiklo nga himuong pampasaheroan ingon man ubos sa Republic 4136 o ang Land Transportation and Traffic Code, dili mamahimong pasaheroan kining motorsiklo. Nipasabot ang direktor nga kining desisyon sa DOTr-TWG, alang kini sa kaayohan sa mga pasahero.

Sa pagkutlo ning balita, wala pa makadawat ang LTFRB 7 ug Land Transportation Officer (LTO) 7 og mando gikan sa ulohang buhatan kabahin sa termination sa pilot study sa motortaxis.

Si Montealto nagkanayon nga kon aduna na’y mando gikan sa ilang ulohang buhatan, i-activate kining Inter Agency Council for Traffic (IACT) diin gilangkuban sa LTFRB, LTO, Philippine National Police, Armed Forces of the Philippines (AFP), ug Highway Patrol Group (HPG) diin mao kini nga mga ahensiya nga manakop sa illegal nga motortaxis. Dugang ni Montealto nga isip co-chairman sa IACT, mao kini ang iyahang irekomendar.

Tugtan

Atol sa hearing sa Senate Committee on Public Services sa legalization sa Motortaxi kagahapon, Enero 20, namahayag si Go nga iyang irekomendar kang Duterte ug Tugade nga hatagan pa og extention ang pilot study sa maong matang sa pampubliko nga transportasyon.

“I will recommed the extension of the pilot study to the President and to Secretary Tugade, provided that they will abide and care for the safety of the passengers,” si Go nagkanayon.

Dugang ni Go nga di siya anti-business ug gusto lang niya nga mahatagan og tingog usab ang publiko ug mapabilin ang luwas nga pagsakay sa mga pasahero.

Ang DOTr, sa ilang pamahayag, nagkanayon nga ilang gipaminaw ang mga sentimyento nga giisa sa Senate Committee on Public Services. Gani, magtagbo na usab ang TWG aron pagahisgutan kini.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph