WALAY piyansa nga girekomendar ang korte sa usa ka overseas Filipino worker nga nadakpan sa mga otoridad niadtong Huwebes, Enero 16, mga alas 7:30 sa buntag sa Purok 1, New Compostela Valley, Damulog, Bukidnon.
Gilusad sa Damulog Police Station, sa pagpanguna ni Police Captain Dino Cuevas, ang pagsilbi sa pito ka mga warrant of arrest batok kang Crisilyn R. Baticani, 39, dalaga, usa ka OFW sa Saudi Arabia, ug residente sa Purok 01, New Compostela Valley, Damulog, Bukidnon.
Si Baticani adunay warrant off arrest sa illegal recruitment nga adunay criminal case 12-189840 penetsahan niadtong June 28, 2013 nga giisyu ni Charito Gonzalez, kinsa presiding judge sa Regional Trial Court, National Capital Region, Branch 80, Quezon City ug walay bail bond nga girekomendar niini.
Adunay gihapon kini giatubang nga three counts sa estafa, nga adunay girekomendar nga piyansa nga P18,000; duha ka ihap sa online libel nga giisyu ni presiding judge Dennis Alcantara sa 10th Judicial Region, Branch 18, sa Cagayan de Oro City, Misamis Oriental nga adunay bail bond nga girekomendar nga P48,000 matag kaso, ug ang libel nga kaso nga giisyu ni presiding judge Emmanuel P. Pasal sa 10th Judicial Region, Branch 38, ning siyudad sa Cagayan de Oro, nga adunay P20,000 nga bail bond nga girekomendar.
Nagtingkagol na sa prisuhan karon panahona si Baticani.