PADAYONG nagpahimangno ang lokal nga kagamhanan sa siyudad sa Cagayan de Oro nga dili magmakuli sa pagtawag diha sa "health online" nga dugay na nga gimugna sa siyudad sa Cagayan de Oro alang sa mental health program.
Kini human nga dunay lain na usab nga menor de edad ang nagpakamatay niadtong Enero 18 mga alas 7:45 diha sa Zone-2 Tamparong Compound, Barangay Kauswagan pinaagi sa paghikot sa kaugalingon gamit ang pisi.
Gibutyag ni Oliver Egypto, acting city administrator, nga kaniadto pa kining mental health program sa dakbayan sa Cagayan de Oro, diin dunay mental health group sa siyudad nga maoy makatutok niini nga problema.
"In fact this time, gi-klaro nato naay 'health online' or kung gusto ninyo personal, bisita gyud sa CSWD nga team nato. Naa tay mga trained gyud ug in fact, professional gyud ana nga hisgutanan or kung mag alanganin mo direkta, mao to via online naa pud tay hotline," matud ni Egypto.
Nasayran nga pwedi usab nga motawag sa 911 kung naghambing ka og depresiyon sama nalang kung ikaw naguol, nasakitan ug uban pa.
Naghangyo usab si Egypto sa mga pamilya labi na nga bantayan ang matag miyembro.
"Lastly, hangyo pud nato sa atong mga kaigsoonan kung naa tay kauban sa pamilya nga makabantay ta nga dunay problema ayaw i-underestimate kay usahay wala ta kabalo unsay capacity sa iyang paghandle sa iyang problema," dugang niini.
Giingong angayang istoryahan labi na nga mamatikdang dunay kabag-ohan sa matag indibidwal.
"Communication lang gyud, istorya, ipagawas unsay iyang gibati at the same time mag offer pud ta og tabang unsay pwedi nato matabang," dugang niini.