MOKABAT na dul-an tunga sa bilyon ang nakolekta nga buhis sa dakbayan sa Cagayan de Oro sugod niadtong Enero 2 hangtod Enero 17 ning tuig 2020.
Kumpara sa nilabay nga tuig sa susamang mga panahon, dunay P86,274,780 nga deperensiya tungod kay kaniadto, anaa lang sa P289,311,058.87 itandi karon nga anaa sa P375,585,839.49.
Samtang sa ihap sa mga nag-renew kaniadto, anaa lang sa 7,403 apan karon, niabot na kini sa 7,478.
Sa pakighinabi kang acting city administrator Oliver Egypto, gibutyag niini nga mas dako kaayo karon ug kini tungod sa hugot nga kampanya sa dakbayan diha sa pag-aghat sa mga negosyante pag-renew sa ilang mga business permit ug nakasabot na usab kini sa tumong niini.
"Siguro, nag-epekto na ang atong campaign kay for the past months, nangampanya man gyud ta og maayo nga i-avail ang atong business renewal nga processing period kay para tabang pud sa city government," matud ni Egypto.
Gidugang pa nga posibleng nakasabot na usab ang mga negosyante nga alang usab kini sa katawhan ilabi na diha sa mga proyekto sa dakbayan.
"Akong nakita ani nakasabot na pud ang uban, kay kung wala pud income ani, di sila mo-renew, wala'y kita wala po'y pundo para sa atong mga proyekto," dugang pa.
Magdepende pa usab sa City Council kung aprobahan kung ugaling dunay iduso ang Oro Chamber alang sa paghangyo og lugway kung ugaling.
Una na nga nibutyag si Konsehal George Goking nga alang kaniya, dili kini mag-endorso og lugway tungod kay ila na nga gihatag ang tanang panahon para niining business permit renewal.
Kahinumdoman nga kagahapong adlawa, Enero 20, ang pinakaulahing gihatag sa lokal nga kagamhanan sa dakbayan alang sa pag-renew sa mga business permit sa mga negosyante.