LAMBERTO G. CEBALLOS
Cawayan, Dalaguete, Cebu
GI-PARKING ni Oliver Carza ang iyang awto tungod sa Honeybee nga nahimutang diha sa Osmeña Blvd. aron pagpalit og fried chicken ug burger steak alang sa panihapon nilang duha ni Francine, iyang anak nga naa na sa Grade 9. Duha na ka tuig nga divorced siya sa iyang asawa nga nagtrabaho isip OFW sa Singapore. Siya ang moluto sa ilang pamahaw kada buntag. May usa ka semana nga alawans si Francine para sa iyang paniudto ug esnak. Siya ang mopalit og pagkaon para sa ilang panihapon. Gikan pa siya sa bupete sa Rosal, Caballero & Associates, diin usa siya ka associate lawyer. Ang bupete nahimutang sa Pelaez St., Cebu City. Adto siya pauli sa ilang balay nga tua sa Guadalupe.
Pasado alas singko na sa hapon adtong tungora ug dihang nigawas na siya sa food chain, gisugat siya sa usa ka traffic enforcer ug gitunolan og citation ticket kay ni-parking siya sa ‘No Parking’ nga lugar. Babaye ang traffic enforcer ug sa pangagpas ni Oliver mga bayenti utso ang edad niini. Guwapa kini ug may pagka may-ong kang Toni Gonzaga. Ang gitas-on mga 5’3”. Ubos niyag duha ka pulgada kay siya, 5’5” man.
“Wa man ko kitag no parking sign dinhi, Miss Liwanag!” matod ni Oliver human nakasiklap sa name plate sa traffic enforcer.
“Unsay wa? Tan-awa na!” Gitudlo sa traffic enforcer ang sign nga nagpilit sa kahoy tungod sa gi-parkingan ni Oliver sa iyang awto. Nahawongan kini sa mga dahon sa usa ka sanga, mao nga wa siya makamatikod niini.
“Pasayloa lang ko, Miss Gwapa! Nagdali man god ko kay naghuwat na karon sa balay akong anak gikan sa school alang sa among panihapon. Wa may makaluto sa amo, kay diborsyado man ko sa akong misis,” ni Oliver.
“Bolatik man na, Sir. Pero kon di tika isyuhan ako man poy madaot,” sa traffic enforcer.
“Ilisi lang na og parking fee, Mrs. Liwanag. Mobayad ko.”
“Uy, Sir! Miss pa baya ko! Okey, isyuhan tikag parking fee receipt.”
“Salamat kayo, Miss...”
“Miss Sheila Liwanag...”
“Okey. Can I call you Sheila? Pwede hatagan ko nimos imong cp number? Gusto ko makig-textmate nimo.”
Mitutok si Sheila kang Oliver ug mipahiyom. “Okey!”
Gikuot ni Oliver ang iyang selpon sa side pocket sa iyang karsones ug gi-save ang numero ni Sheila.
Nianang pagka gabii diha sa iyang lawak wa dayon mahikatulog si Oliver. Gibati siyag kauhaw samtang naghunahuna kang Sheila. Migawas siya ug mipaingon sa kusina. Naagian niya sa sala si Francine nga nagtan-aw sa TV. Ang orasan sa bungbong nagtug-an nga alas diyes na sa gabii.
“Tulog na, Inday,” ni Oliver. Mitindog si Francine ug gipawong ang TV.
“Good night, Dad!” ni Francine nga mihalok sa aping ni Oliver.
Didto sa kusina giyarok ni Oliver ang usa ka basong tubig. Mibalik siya sa iyang lawak. Unya gipunit niya ang iyang selpon ug gitulpok ang numero ni Sheila. Gitawgan niya kini.
“Hello? Kinsa ni?” ni Sheila. “Si Oliver ni, Miss Gwapa!” “O, Sir. May tuyo ka?”
“Gusto ko makigkita nimo ugma human sa imong dyuti,” ni Oliver. “For what purpose?” ni Sheila. “Buot kong magkasuod ta. Kana, kon mosugot ka. Pero ayna kog tawgag Sir!” ni Oliver, “Okey, Oliver, makigkita ko nimo,” ni Sheila. Ug nagsabot sila sa lugar asa sila magkita.
“Good night, Sheila!” ni Oliver. “Sweet dreams!”
“Good night, Oliver!” ni Sheila. Mao ni ang sinugdanan sa ilang gugma. May sumpay pa. (KATAPUSAN)