DEAR Noy Kulas,
Tagoa lang ko sa name nga Sheila, 26 years old, Mabdos ko karon ug mao ni ang akong problema.
Duna koy kapuyo nga toa sa abroad nagtrabaho. Diri na siya nagtrabaho kaniadto mao nagkaila mi, nagkauyab ug nagpuyo. Sa among three years nga pagpuyo wa mi makaanak. Wa ko momabdos.
Nilarga siya sa abroad ug sa akong kamingaw, nagkasuod mi sa iyang brother nga ulitawo. Kani lagi nga mingawon ta og maayo, ang akong shock absorber ang iyang igsuon hangtod nga nagkahigugmaay mi ug pila man ang estorya, naay nahitabo namo, di lang one, several times na.
Karon mabdos na ko og three months. Mao ni ang akong problema kay nahadlok na ming duha. Gusto sa akong uyab nga ipakuha namo ang bata aron di magubot, but di ko gusto nga makasala sa Ginuo. Ako siyang giingnan nga magtaban na lang ug mopalayo aron di moulbo ang kagubot. Galibog pa siya kay close ni sila. Nag-worry ko kay tungod nako maguba ang maayong relationship sa pamiilya. Unsa kaha ang akong buhaton? Please tambagi ko.
Sheila
Sheil,
Kinahanglan nga unahon nimo og pahibawo ang imong pamilya sa problema aron duna usab silay ma-suggest. Tinuod bitaw, dako ni nga kagubot sa pamilya kon mahitabo nga mahibaw-an nga mabdos ka ug ang igsuon ang amahan. Gubot man gani kon laing tawo, unsa na kaha kon family member na ang makaigo sa ingon niani nga situation? Betrayal man gud ni nga nasobraan sa ka sakit. Nagluib ka ug ang imo pang kauban sa pagtraydor ang iya pang igsuon. So, you need help from your family.
Usa sa maayo nimong buhaton mao ang pagpaluyo o pakigbuwag sa imong kapuyo ug molangyaw ka og lugar nga layo hangtod nga manganak ka.
Nganong ingon niani ang maayong buhaton? Ang pagpataudtaud gud sa kasayuran sa mga hitabo nga ingon niani mopaminos sa impact sa ka sakit. Kay sa karon nga panahuna nga mahibaw-an mo, matay-og gyud ang ilang pamilya. Sure ko nga mo-support nimo ang imong pamilya kay makaayo kini nimo ug sa imong gisabak. By the time tingali nga iyang mahibaw-an ang tanan, healed na ang samad sa kasakit sa imong pagbiya.
By that time, di na kaayo ingon niana ka sakit ang ma-feel sa imong kapuyo. Sa pagkakaron, that is the best option. Unya, pag-ampo nga hatagan ka sa Ginuo og kalig-on ug Iya kang gihayahan kanunay.
Noy Kulas
Alang sa imong problema, e-mail sa kulassuper@sunstar.com.ph ug rojval69@yahoo.com