KLAREX ug di malalis nga duna gyuy cold war karon ang mag-ex nga Julia Barretto ug Joshua Garcia. Makita ug ma-feel ni nimo sa ilang mga body language.
Nag-ung-ong pa lang mi sa pultahan aron interbyuhon ang cast atol sa promo show sa ilang pelikulang Block Z sa backstage sa SM Northwing niadtong Sabado, gipasidan-an na ming daan nga “no personal questions.”
Plano gyud unta ko mangutana kon tinuod bang gi-unfriend ni Julia sa Instagram si Joshua ug Janella Salvador pero wa na lang kay basin mobuto unyag samot ang bulkang Taal.
Ako na lang gi-generalize kon kumusta ang working relationship sa cast. Ug wa tuyoang nalingian nako si Mccoy de Leon nga nagngisi nga nagtan-aw nilang Joshua ug Julia nga bugalbugalon kaayog nawong.
Nindot baya ang trailer sa Block Z nga maorag Train to Busan ang peg.
Dili ra man sad silang Joshua ug Julia ang mga bida dinhi, naa sad silang Mccoy ug Yves Flores nga kauban nila sa promo sa Cebu, Maris Racal, Myrtle Sarrosa, Dimples Romana, Ina Raymundo, ug Ian Veneracion. Showing na ni sa Enero 29.
Bb. Cebu
Kauwaw diay sa nahitabo sa coronation night sa Bb. Cebu 2020.
Gawas nga alas nuwebe na nasugdan imbes alas 7 unta, gipa-take 2 pa gyud ang production number sa mga kandidata tungod kuno ha sa technical difficulties.
Mao diay pagtan-aw nako sa Facebook Live nagmika na ang nawong ni Catriona Gray paggawas niya sa stage kay alas 12 pasado na gud to sa tungang gabii.
Ang gikahibudngan nako nganong duna pay gamayng bata sa stage atol sa ilang Q and A sa disoras sa gabii? Wa pa gyuy farewell walk ang 2018 winner.
Laysho kaayo ilang premyo ug venue. Hasta ang mga emcee English paka kaayo (pagbinisaya sad mo panagsa uy) unya ang presentasyon nagkagidlay diay.
Morissette
Kon tigbasahan mo sa akong kulom nakabasa na gyud tingali mo sa mga past comment nako aning Morissette Amon.
Way duda nga maayo mokanta ang atong paysana sa Cebu. Apan sama na sa akong gikaingon nga unta kuhakuhaan na niya ang iyang mga birit.
Niadtong Dominggo sa ASAP nayabag na sad ni kay bisan ang simpleng “Sometime Somewhere” ni Basil Valdez gipatas-an pa gyud niya mao ang ending nisiyaok.
Obviously, dili na ni mao ang Morissette nga akong nailhan ug personal nga nibisita nako niadto sa Superbalita nga simple, buotan ug mapaubsanon.