LINAW. Malinawon ang Sinulog grand parade niadtong Dominggo tungod kay way dautan nga mga panghitabo. Dugay hinuon nga nakasugod apan malampuson kaayo ug mitabang pa ang panahon kay dili kaayo init ug wala moulan. Kagahapon na mibundak ang ulan. Pit Senyor!
Matud pa sa mga storya sa kilid-kilid, maayo diay nga moapil og tan-aw si Presidente Duterte sa Sinulog kay ang tanan dalan dunay pulis lakip na kadtong mga dapit nga dili na maagian sa Sinulog parade. Sa komedya pa sa Ilonggo “ kada pusod, may pulis”.
Magpasalamat ta nga niduyog si Presidente Duterte sa selebrasyon sa Pista Senyor bisan pa sa iyang pagsupak sa pamaagi sa Simbahan Katoliko. Hinuon, ang iyang gitan-aw ang grand parade, dili man ang ritwal sa Pista Senyor sa Simbahan Katoliko.
Human sa malampuson nga Sinulog 2020 morag naibtan og tunok si Cebu City Mayor Edgar C. Labella bisan pa sa di maayo nga mga isyu sa wala pa ang selebrasyon tungod sa pagdumala sa Sinulog Foundation, Inc. (SFI) sa mga sponsor ug pagbaligya sa solo TV coverage rights ngadto sa MyTV.
Maayo gani kay giaksyonan dayon si Mayor Labella ang isyu homan gidabodabohan sa mga netizen ug komentarista sa radyo dihang nahibaw-an nga gisolo ang coverage sa Sinulog sa MyTV, nga gipanag-iya sa akong amigo ug maglilindog Bobit Avila.
Ang uban nga TV network nakakover lang gihapon sa rota sa Sinulog parade ug kutob ra usab sila sa buntag. Ang MyTV nag-cover sa Abellana sports complex diin didto gihimo ang katapusan nga presentasyon o sayaw nga gipagawas sa Skycable. Ang walay koneksyon sa Skycable luoy kay di makakita.
Bisan tuod naurong kadiyot ang dagan sa Sinulog ug ang sa Abellana nga presentasyon tungod sa pag-abot ni Presidente Duterte uban ni Sen. Bong Go ug Visayas Presidential Asst. Michael Lloyd Dino, apan dunay maayo nga balita nga gidala ang Presidente.
Tungod sa trapiko nga nasinati ni Presidente Duterte gikan sa erport padung sa Abellana bisan tuod og duna siyay wangwang nga escort, misapalig siya atol sa iyang mensahe, nga mohatag og pundo alang sa lightrail train (LRT) ug skyway sama sa Manila.
Gani, gihimo ni Presidente Duterte nga ehemplo ang Metro Manila nga tungod sa grabe na nga trapiko ug kay di na mapalapdan ang mga dalan adto na sa ibabaw ang dalan, kanang gitawag nga skyway.
Makahinumdum na hinuon ko kaniadto sa unang termino ni kanhi Mayor Mike Rama sa dakbayan sa Sugbo samtang si Eddie Gullas ang kongresista sa unang distrito sa Sugbo ug si Soc Fernandez pa ang mayor sa Talisay city diin si Eddiegul, nga kongresista gihapon karon, mitanyag nga mangita siya og pundo alang sa LRT nga motadlas sa Cebu city gikan sa Talisay city kutob sa Mandaue city. Mibabag si Rama kay, matud pa niya, makababag sa iyang panan-aw ang skyway.