ANG labing dakong problema nga giatubang sa mga Sugboanon matag adlaw mao ang suliran sa trapiko. Maghilak ang adlaw nga way dapit nga di maghuot ang mga sakyanan.
Ang kalisod sa Sugbo ang gagmay nga mga karsada nga di na mahimong mapadak-an pa.
Si Presidente Rodrigo Duterte, sa iyang speech sa Cebu City Sports Center atol sa Sinulog Grand Parade, nisaad nga motabang siya sa pagpangita og pundo aron makabutang og tren dinhi. Iyang nakita nga tungod sa kahagip-ot sa mga karsada ug lisod nang padak-an, ang tren maoy labing epektibong mass transportation.
Bitaw, kalisod kon padak-an ang mga karsada kay sa mga daplin ini sa Cebu City naa nay dagkong mga balay patigayon. Gawas sa dagkong presyo sa luna matag metro kwadrado, bayran pang mga edipisyong maguba. Imposible na nga mahitabo ni.
Maanindot ang pamahayag sa Presidente. Apan di ba namahayag na ang mga opisyal sa kagamhanan nga sa di madugay, masugdan na ang mga imprastraktura alang sa pagbutang og mga train dinhi sa Metro Cebu?
Niingon siyang motabang sa pagpangita og pundo aron kini matigayon. Sa ato pa, kon mangita pa og pundo si Duterte, wa pa diay klaro kanus-a masugdan ang mao nga matang sa mass transport system? Basin mahuman na lang ang iyang termino, bisan usa na lang ka haligi, wa pay mapabarog.
Maanindot ra ba og estorya ang mga opisyal sa kagamhanan, mohatag kunohay og update sa dagan sa mga proyekto, apan diay, wa moirog. Maayo pang bao kay bisan hinay ang lakaw, klaro pa ang padulngan. Naay mga proyekto sa kagamhanan, naa lang sa plano ug drawing board kutob.
Kapait no, kon mahuman na lang ang termino ni Duterte nya di pa ni masugdan.