MATALAM, North Cotabato -- Nag-inusarang nisurender ang miyembro sa New People's Army (NPA) ngadto sa militar alas 2:30 sa hapon niadtong Dominggo, Enero 19.
Giila ang rebelde nga mao si alyas Raffy, sakop sa Guerilla Front Committee 53 nga naglihok sa nahisgutang probinsiya.
Gibutyag ni 602nd Brigade Commander Brigadier General Roberto Capulong nga misurender sa 7th Infantry Battalion sa Philippine Army nga gipangulohan ni Lieutenant Colonel Niel Roldan ang rebelde sa Matalam.
Dala ni alyas Raffy sa iyang pagbalik sa sabakan sa balaod ang usa ka M14 rifle ug mga buhing bala.
Gikanayon ni alyas Raffy nga gusto na niya nga manginabuhing malinawon, uban ang iyang mahal nga pamilya.
Gawas niini, wa na sab makasabot si Raffy sa ilang gipakigbisugan gumikan gipasaligan sila sa ilang lider nga dunay madawat nga suweldo matag bulan apan pakyas.
Namatikdan sab ni Raffy nga ang ilang mga lider lang ang nakuwartahan ilabi na si Joma Sison nga tua nagtago sa gawas sa nasud.
Samtang subling nanawagan si Colonel Roldan sa uban pang mga NPA nga mosurender na ug iyang gipasalig nga sila matabangan ilawom sa programa sa administrasyon ni Presidente Rodrigo Duterte nga Enhanced Comprehensive Local Integration Program. (Edgar E. Fuerzas)