GIKATAHAPANG drug pusher naa sa kritikal nga kahimtang human giingong nang-ambush sa mga pulis sa Brgy. Camboang, lungsod sa Dumanjug, Sugbo niadtong Dominggo sa gabii, Enero 19, 2020.
Ang suspek nga naa sa kritikal nga kahimtang giilang si Aldren Baya, 24, nagpuyo sa nahisgotang lugar.
Si Abaya samdan sa dughan ug aana sa Vicente Sotto Memorial Medical Center human gipaubos sa operasyon
Samtang nadakpan iyang kauban nga si Richard Dacalos, legal age, taga Pardo Cebu City, kinsa nakuhaan og kalibre .45 nga pistola ug mga bala ingon man tulo ka putos sa shabu
Si Baya nakuhaag .38 kalibre nga rebolber nga dunay upat ka mga human sa ilang pinusilay.
Si Police Sr. Master Sgt. Nelson Mendaros sa Dumanjug Police Station nga nahinabi sa Superbalita Cebu nagkanayon nga nakadawat silag tawag sa hotline gikan sa mga brgy. opisyal nga nagpadayon ngà negosyo sa illegal nga drugas sa dapit.
Ang iyang mga kauban daling ningresponde pagsuta sa impormasyon.
Sa ilang pag-abot sa dapit, ilang nakita ang usa ka lalake nga nagpahipi sa ngitngit.
Kalit lang may misinggit og “dunay mga pulis!”
Dayon gipauwanan og mga bala ang mga pulis.
Daling ningpasalipod ang mga pulis dungan sa ilang pagbawos kang Baya.
Maayo gani kay way naigo sa mga pulis kay dali silang nakabantay.
Si Baya naigo dughan ug gidali pagdala sa tambalanan sa Barili, apan kay kritikal, gibalhin sa VSMMC.
Matod ni Mendaros nga ang duha mag-atubang og kasong attempted murder, illegal possession of firearm ug possession of illegal drugs. (GPL)