SUPERBALITA CEBU

CPPO: Talisay tutokan sa kapulisan

OPERATION: Usa lang kini sa mga anti-drug operation nga gipahigayon sa kapulisan sa Dakbayan sa Talisay sa miaging semana. (Tampo sa Talisay City Police)

GIUYONAN sa mayor sa Talisay City ug hepe sa Talisay City Police ang giluwatan nga pamahayag ni Presidente Rodrigo Duterte nga usa ang Siyudad sa Talisay ang ‘way pahuway’ sa ginadili nga drugas.

Apan giklaro ni Mayor Gerald Anthony Gullas Jr. ug Police Major Gerard Ace Pelare nga nakita nila nga tinuod, tungod sa daghan na nga nahimo nga anti-drug operation ug daghan usab ang nasikop, diin minilyon na nga balor sa drugas ang nasakmit.

“Kani bang drugas, kusog diri sa Cebu. Kanang Talisay wa na nay pahuway. Naa ang tanan dihang kabuang. Hasta ang inyong mga deputy director naa sa druga. Mao tong naay daghan gipangpatay diri nga chief of police,” tipik sa pamahayag ni Duterte Dominggo sa gabii, atol sa pagtambong niya sa Sinulog grand parade.

Apan ang mga opisyal nagkauyon nga lahi na ang kahimtang sa illegal drugs kaniadto ug karon tungod sa subsob nga kampanya.

Nunot usab niini, tutokan sa Cebu Provincial Police Office (CPPO) ang Talisay City sa ilang anti-drug operations.

Si Gullas nitug-an nga nakahigayon siya sa pagpakig-estorya sa pangulo sa nasud, Duterte, atol sa dinner uban ang mga government official.

“After the President’s speech, I was lucky enough to be able to have dinner at his table. This is where I had the opportunity to talk to him. He told me what my city’s illegal drug problem has become and I told him what we have done to eradicate that problem,” saysay ni Gullas diha sa iyang FB post pipila ka oras human sa pahibawo ni Duterte.

Tulo ka barangay

“Despite the President’s pronouncement, I assure our constituents that we are not lazily ignoring this problem. I agree with our President that the illegal drug problem in our city remains a pressing issue, especially in Barangays Tangke, San Roque and Sitio Mananga in Tabunok,” dugang ni Gullas.

Ang problema sa illegal nga drugas sa Talisay anaa na bisan sa di pa mayor si Samsam.

Gani, niadtong 2018, tanang mga pulis sa TCPS girelibuhan gawas lang sa kanhi hepe nga si Police Major Marlu Conag, kinsa karon maoy hepe sa Provincial Intelligence Branch (PIB) sa CPPO.

Matod ni Gullas nga gikan sa 2018, moabot sa 217 ka mga giilang drug pusher ang nasikop, 12 ang napatay sa police operations gikan sa Septiyembre ngadto Disyembre 2018.

Dul-an sa P4 milyones nga balor sa drugas ang nasakmit.

Niadtong Enero hangtud Septiyembre sa niaging tuig, si Major Orlando Carag na usab ang nidumala sa TCPS sukad Hulyo hangtud Oktubre, niabot sa 541 ka suspected drug pushers ang nadakpan.

Moabot usab og 17 ang napatay human giingong ningsukol atol sa operasyon ug niabot sa P10 milyones nga balor sa drugas ang nasakmit.

“With the appointment of our police chief, Major Gerard Ace Pelare, last October (2019) we’ve seen continued arrest against pushers and sellers in our city. Last week, our local police’s Oplan Limpyo Talisay yielded results, arresting more than 40 suspected drug sellers and confiscating close to P5 million worth of illegal drugs,” asoy ni Gullas.

Gikan Enero 1 hangtod niadtong Sabado, Enero 18, nakasakmit na usab sila og P5.4 milyones nga balor sa shabu gikan sa 46 ka mga nasikop atol sa 13 ka mga anti-drug operation.

Gisegundahan usab kini ni Pelare, kinsa sa iyang pamahayag nitug-an tungod sa pagkasakmit nila sa kapin P9 milyones na nga balor sa drugas sukad Oktubre 2019 hangtud sa Enero 2020, ug sa 238 nga nasikop nga mga illegal drug personalities, 22 kanila ang gikonsiderar nga HVT.

Highlight sa ilang operasyon mao ang 13 ka buy-bust operations ning Enero, diin 46 ang nasikop lakip na ang pamilyang’ Obrero, tulo ka magsuon ug inahan, nga giila nila nga dakung drug dealer sa syudad, ilabi na sa Tangke, San Roque ug Tabunok.

“With the recent pronouncement of the President, Talisay City Police Station together with the City LGU and the community, is up to the challenge and is one with everyone in our collective goal of ending the illegal drug problem,” saysay ni Pelare.

Alang kaniya, hagit ang sulti ni Duterte.

Sa pangutana kon aduna bay naghatag og proteksyon nga mga sakop sa gobyerno sa mga nalambigit sa illegal nga drugas lakip na sa hut-ong sa kapulisan, wa makadawat og kasayuran si Pelare.

Iyang giawhag ang mga lumolupyo sa Barangay Tanke sa pagtabang kanila.

“I hope the good citizens of Tanke will not keep quiet. Instead of keeping their mouths shut, they should side with the law enforcement agency because if they keep on keeping their mouth shut because they are afraid then they will be the ones to suffer,” dugang ni Pelare.

Talisay tutokan

Gisuportahan usab ni Police Colonel Roderick Mariano ang pamahayag ni Duterte, apan iyang gipasabot nga ang problema sa illegal nga drugas sa siyudad sa Talisay di na sama kaniadto.

Matod niya nga naa pa gihapon ang supply sa drugas nga mao karon ang ilang hingusgan uban ang Philippine Drug Enforcement Agency 7 (PDEA) 7.

“At then again, the President still said that meron pa rin. Naniniwala naman tayo na meron pa ring drugs, but comparing to the last year, mas masyado pang nag-reduce na siya, but then, meron pa rin,” matod ni Mariano.

Wa hinuoy ipatuman nga lahugay si Mariano sa mga pulis sa Talisay sanglit pulos na bag-ong personnel ang na-assign sa police station.

Tungod kay nakuhaan sila niadtong milabayng tuig ug na destino sa National Capital Region police Office.

Sa gipakita nga accomplishment sa CPPO sa ilang kampanya batok sa illegal nga drugas sa milabayng tuig, nakasakmit na silag P164.7 million, diin 2,041 ka drug personalities ang nangadakpan ug napasakaan og kaso sa korte.

Si PDEA 7 Director Wardley Getalla, sa iyang bahin, nibutyag nga ilang doblehon ang ilang trabaho ug ilang itutuk karon ang ilang mga anti drug operation sa siyudad sa Talisay.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph