GIPANGULOHAN nila ni LaMarcus Aldridge ug DeMar DeRozan ang balanseng ataki sa hosts San Antonio Spurs nga maoy gihimo nilang hinagiban sa pagpukan sa Miami Heat, 107-102, kagahapon sa National Basketball Association (NBA).
Si Aldridge nagpakatap og 21 puntos samtang nidugang si DeRozan og 20 puntos apan ang nikawat og dakong atensyon mao ang kakuyaw sa duwang gipakita ni Patty Mills.
Ning sangkaa, ang Spurs nagsaulog og Indigenous People Night nga mahinungdanon alang kang Mills, kinsa usa ka lumad nga Australian. Ang Spurs mao ang labing unang naghimo niini.
“It’s an important night and it’s really important to Patty,” matod ni San Antonio coach Gregg Popovich.
“For the indigenous people here in Texas it’s important to all of us, but it’s sort of double for him because of his history and his background.”
Si Mills mihangyo sa Spurs nga pahinungdan ang iyang mga kaliwat ning kombatiha nga giuyonan sab sa management.
Tataw nga nadasig, si Mills maoy unang miagak sa Spurs sa sayong bahin ug namugna niya sa 1st half ang 14 sa iyang kinatibuk-ang 18 puntos.
Nibahar na man tuod ang opensa ni Mills sa 2nd half apan padayon kining nag-agak sa Spurs sa ubang mga departamento.
“Besides basketball, it was a win for us to be able to use basketball as a platform to be able to share culture and traditions and you saw it tonight,” asoy ni Mills.
Gikan sa sinugdanan, grabe na ka kulbahinam sa kombati sa duha mga kampo ug sa nahabiling 10.2 ka mga segundos, igo lang naglabaw og 105-102 ang Spurs.
Si Duncan Robinson sa Heat misuway pagtabla sa duwa pinaagi sa iyang three-point attempt apan nasipyat kini ug nakuha ni Spurs guard Marco Belinelli ang rebound.
Daling gi-foul sa Heat si Belinelli hinungdan nga nahatod kini sa 4.5 meter line diin niya gipasulod ang iyang duha ka freethrows nga nagposte sa final score.
“It’s a big moment,” matod ni Robinson kabahin sa iyang nasipyat nga tres. “I want to make that shot for this team. I didn’t do it. I’m disappointed in myself, but it’s nice to know these guys have my back no matter what.”
Ang Spurs ningsaka sa 18-23 nga rekord, ikasiyam sa Western Conference, samtang Heat naunlod sa 29-13 nga rekord, ikaduha sa Eastern Conference.
Ang Heat gipangulohan ni Bam Adebayo pinaagi sa iyang 21 puntos ug 16 rebounds, nidugang og 19 puntos si Goran Dragic, niamot og 18 puntos si Kendrick Nunn samtang nitampo og 16 puntos si Jimmy Butler.
“I actually liked the way we competed,” matod ni Butler.
Sa laing duwa, gipangpukan sa hosts Denver Nuggets ang Indiana Pacers, 115-107.
Ang Nuggets ningsaka sa 29-13 nga rekord, ikatulo sa West, samtang ang Pacers ningdakin-as sa 28-15 nga baraha, ikalima sa East. (AP, ESL)