GIPUKAN ni Anton Raga si Eljun Abellana, 8-5, sa finals aron langkaton ang kampiyunato sa Jancor Promotion Sinulog 10-Ball Invitational Tournament niadtong Enero 19, 2020 sa Jancor Billiard Hall sa dalan Manalili, dakbayan sa Sugbo.
Ning maong kombati, si Raga, kinsa kanhi Sun.Star Superbalita 9-Ball champion, kanunay nga naglabaw sa duwa hangtod na sa katapusang dumbol.
Sa kadaugan, naangkon ni Raga ang P70,000 nga ganti samtang nakabulsa og P50,000 si Abellana.
Ang kombati sa ikatulong dapit wala na gidayon ug nagkauyon ang duha ka mga protagonista nga magbahin na lang sa ganti.
Mokabat ngadto sa P150,000 ang kinatibuk-ang ganti sa promosyon nga gipasiugdahan sa tag-iya sa Jancor nga si Allan “Toryaw” Cortes inabagan ni tournament director Allan Milan. (ESL)