DILI sayon dawaton alang kang Mary Joy Tabal ang pagkatangtang sa iyang duha ka mayorihiyang mga titulo sulod lang sa kapin sa usa ka buwan.
Apan taliwala ning tanan, wala mawad-i og kadasig ang Cebuana Olympian.
Matod ni Tabal nga gamiton niya ang maong mga kapakyasan isip usa ka dakong hagit aron mas maningkamot siya nga mapalambo ang iyang abilidad.
Ang 30 anyos nga garbo sa brgy. Guba, Cebu City napakyas pagdepensa sa iyang mga 42K women’s title sa Southeast Asian (SEA) Games niadtong Disyembre sa miaging tuig ug Milo Marathon National Finals niadto lang Dominggo, Enero 19.
Ang sumosulbong nga kababayang si Christine Hallasgo sa Malaybalay, Bukidnon maoy nag-ilog sa duha ka mga titulo ni Tabal.
“First thing to do is recover and reset and we go back to square one,” matod sa kanhi sprinter sa Southwestern University.
Si Tabal nakakulit na og kasaysayan sa Milo Marathon National Finals dihang nakalangkay kini og unom ka sunodsunod nga mga titulo sa wala pa siya nalupig ni Hallasgo.
Kinasingkasing nga gihangop ug gidawat ni Tabal ang iyang kapildihan batok kang Hallasgo apan malaumon siya nga sa ugma damlag, makabangon ra siya sa kapakyasan.
“In every athlete’s accomplishments and setbacks, there are stories behind that not everyone will know and understand. This is sports, you win, you win! You lose, you lose! But when you lose today, it doesn’t mean that you will lose forever,” post ni Tabal sa iyang social media account.
Ning puntoha, tinguha ni Tabal nga maka-qualify og balik sa Olympics. Una niya kining nahimo niadtong 2016 Rio Games diin nakakuli sab siya og kasaysayan isip labing unang babaye nga marathoner sa Pilipinas nga mi-qualify sa matag upat ka mga tuig nga kompetisyon.
Apan sa dili pa niya itikang ang premiro niyang lakang, kinahanglang mobalik una sa sugod si Tabal alang sa paghan-ay sa iyang mga plano.
Ang labing unang lumba nga tutukan ni Tabal sa tuig 2020 mao ang Tokyo Marathon nga gikatakda karong Marso 1. Usa kini sa mga qualifying event alang sa Tokyo Olympics.
Human niini, ang ace runner sa Motor Ace Kawasaki Racing Team hinayhinay na sab nga mangandam alang sa iyang tinguha nga masakmit ang ikapitong titulo sa Milo Marathon. (RSC, ESL)