GIPASALAMATAN ni Mayor Oscar Moreno ang Filipino-Chinese community atol sa opening ceremony sa kalihokan sa Chinese Festival sa dakbayan sa Cagayan de Oro.
Nasayran nga ang lokal nga kagamhanan sa siyudad nag-obserbar sa Chinese New Year ug nagduyog kanila pinaagi sa mga kalihokan kalabot na sa Chinese festival.
Gibuksan ang kasaulogan pinaagi sa Symphony of Lights niadtong Enero 20 nga dunay Chinese theme diha sa Gaston park nga gitambongan usab sa mga Filipino-Chinese ug naghatag og mga pasundayag sa kulturang Chinese.
Gibutyag ni Moreno nga mapasalamaton siya sa tanan nga nitabang nga nakab-ot sa dakbayan ang mga kalamboan nga karon napahimuslan sa tanan lakip na sa Filipino-Chinese community dili lamang sa dakbayan sa Cagayan de Oro apan lakip na sa Misamis Oriental nga nagpabilin bisan paman nga kaniadto dunay mga hulga sa giyera ug panagbangi.
"I would also like to thank the community and particularly the Filipino-Chinese community for being one with us in looking for a better tomorrow that will be enjoyed not just by a particular sector but everyone here in Cagayan de Oro and Northern Mindanao," matud ni Moreno.
Samtang gibutyag usab ni Eileen San Juan, local economic and investment promotion officer, nga dako ang tabang sa komunidad sa mga Chinese sa dakbayan.
"We see a lot of investments own by Chinese-Filipino also so dako ang ilang contribution," matud ni San Juan.
Gidugang pa nga daghan usab nga mga investment ang nagagikan mismo sa nasud sa China nga gibubo dinhi sa dakbayan.
"There are investments also coming in from those from China gyud maybe in partnership with those who are already here," dugang pa.
Nasayran nga ubay-ubay nga mga kalihokan ang gitakdang ipahigayon alang sa kasaulogan sa Chinese new year sama sa kasamtangang Chinese bazaar nga anaa sa mini park sa City Hall, mga kalihokan diha sa mga malls, fireworks display sa Enero 24, motorcade sa Enero 25, Chinese Cosplay competition sa Enero 26 ug Spring Festival dragon boat race.