GI-APROBAHAN sa konseho sa dakbayan sa Cagayan de Oro ang hangyo sa mga negosyante nga lugwayan na usab ang pag-renew sa business permit ug matapos kini karong Enero 31, 2020.
Gikan Enero 2 ug hangtod Enero 20 ang gitugot sa mga nesgoyante sa pag-renew sa ilang mga business permit apan naghangyo ang Filipino-Chinese chamber rason nga gi-aprobahan kini.
Gibutyag ni Konsehal George Goking, tsirman sa Trade and Commerce, nga alang kaniya, dili na unta angayan ang paghatag og lugway tungod kay sagad usab sa mga negosyante magsalig na.
"Filipino-Chinese chamber, tanan na anybody, mao bitaw akong comment last time wala man nag-request, kung ako personally, di ko mosugot ang uban magsalig," matud ni Goking.
Apan nagpasalamat na lang usab kini tungod kay sa laing bahin, makita nga interesado usab ang mga negosyante sa pagbayad.
Gidugang pa niini nga ilang nasabtan tungod kay nakita man nga daghan pa gyud ang wala makabayad sama nalang nga duna pay mga 5,000 nga anaa sa waiting list sa pagbayad.
"Akong tan-aw pasalamat ko kay daghan diay interesado magbayad sa buwis, it's a business friendly, local government friendly nga maminaw," dugang ni Goking.
Gidugang pa niini nga kini na ang pinakaulahing lugway diha sa pag-renew sa ilang mga business permit.