ALAS kuwatro sa hapon. Sulod sa ground floor sa Foodarama Consolacion, sa may lingin nga lingkuranan diin anha manglingkod ang mga kustomer nga may gihulat, naglingkod si Ponso ug namasin nga duna siyay ikahibalag nga babaye nga mahimo niyang kalingawan. Gawasnon siyang mag goodtime karong adlawa kay tua sa probinsiya ang iyang asawa ug anak. Kuyog ni Sonia ang ilang bugtong anak nga dalaga nga si Maricar. Tulo ka adlaw sila didto. Sabado karon. Sa Lunes na sila mahiuli. Mao ni higayon nga iyang gihulat aron siya makapang-tsiks.
Gitagsa-tagsa niyag tan-aw ang mga nanaglingkod libot sa lingin nga lingkuranan. May bana ug asawa nga mga batan-on. May mga tin-edyer. lalake ug babaye, nga nanagduko lang kay sige’g teks.
May miabot nga seksi ug batan-ong babaye. Mitudlo kini sa bakanteng puwesto sa iyang wala. Miyango si Ponso ug mipahiyom. Milingkod ang babaye sa iyang wala, nga sa banabana ni Ponso anaa sa bayinte ngadto sa bayinte singko ang pangedaron. Misal-ig ug nangilugpoy ang babaye. Mipiyong ug nahitagpilaw. Nakahigayon siya paghimbis sa babaye.
Humot ang babaye sa sabon nga mahalon. Mora kinig bag-ong naligo. Sa banabana ni Ponso 5’4” ang gitas-on niini. (Mas taas siyag tulo ka pulgada.) Mestisahon ang babaye ug kaamgid ni Kim Chiu ang profile. Haom sa iyang lawas ang gisul-ob nga asul nga T-shirt. Maong ang karsones nga piit sab sa iyang hawak, dapidapi, mga paa ug batiis. Nahanduraw ni Ponso nga Coca-Cola body gyud ang babaye kon hubo kini. Daw mibalik ang iyang kabaskog. Daw disi-utso anyos lang siya ning higayuna. Nahinamhinam siya. Huwaton niya nga makamata ang babaye una niya diskartehan.
Tranyenta anyos na nga minyo si Ponso kang Sonia. Kon naminyo pa ang ilang bugtong anak nga nag-edad nag bayenti singko karon, may apo na unta siya. May pagka pilyo siya kaniadto. Sa uyab pa sila ni Sonia, tulo ka buok sila. Kay si Sonia man ang kinagwapahan ug buotan sa tulo, kini maoy iyang gipakaslan. Kini nahitabo dihang nabisto siya ni Sonia nga may laing uyab ug nibahad kini nga maghikog kon di niya pakaslan. Mao nga gipakaslan niya kini. Apan grabe ang kaselosa ni Sonia sukad sila naminyo. Kon molingi lang og gamay si Ponso, sundan dayon og tan-aw ni Sonia kon una o kinsa ang iyang gitan-aw. Sulod sa ilang kaminyuon, wa na gyud makatilaw og laing babaye si Ponso.
Klasmeyt sila sa kolehiyo sa kursong Accountancy. Nagpakasal sila bisan wa pa maka-gradweyt human gibuwagan ni Ponso ang duha ka laing uyab. Sa panabang sa ginikanan ni Ponso ug sa ginikanan ni Sonia nikuha siyag board exam ug nakapasar ug nahimong CPA. Nag-abli silag accounting firm sa Talamban. Apan sa tanang kalihukan ni Ponso, sama sa mga party-party, kombernsiyon sa mga CPA, seminar ug uban pang sosyalan, di kalakaw si Ponso kon di niya ikuyog si Sonia. Karon na lang nga mo-saysinta na ilang edad nga puwede na siya mosuroy nga mag-inusara.
“Miss, nganong kuwang ka man sa tulog?” sukot ni Ponso sa tupad niya dalang paglingi ug pagpahiyom dihang mibuka ang mga mata sa babaye.
“Tibuok gabii man god kong nagbantay sa akong Mama sa ospital,” matod sa babaye nga nagpasiklap kaniya.
‘Arang-arang, mama diay gibantayan, dili bana.’ maoy didto sa hunahuna ni Ponso.
“Pwede imbitahon tika. Adto na lang tiwas katulog sa akong balay. Biyudo man ko. Way anak. Nag-inusara na lang,” ni Ponso; nagdalag ‘come here’ ang tuno. May kidhat-kidhat pa.
“Sugot ko, basta dad-on nako akong kauban. May gihuwat man ko dinhi,” sa babaye.
“Dad-a lang imong kauban. Maayo hinuon aron alegre ta,” ni Ponso nga gibati nag tumang kahinam. “Unsang orasa kaha moabot imong gihuwat?”
“Karong alas singko. Relibuhan man siya karong taudtaod,” sa babaye. “Hain man diay siya ron?” ni Ponso.
“Naa, ay, nagtrapik. Umagad na siya ni Mama.” Gitudlo sa babaye ang unipormadong pulis nga madayag sa bildong bungbong sa Jollibee nga nagtrapik sa highway. Nauknol si Ponso.
“Sige. Mangihi una kog kadiyot samtang maghuwat ka,” ni Ponso dayong tindog. Nagdali siyan milakaw. Nakahukom siya nga mopauli na lang aron motan-aw sa Cable TV. Gikan sa CR paglabay niya duol sa babaye naghagok na kini. (Katapusan)