TALIWALA sa naglungkaob nga problema sa trapiko, padayon ang pagdagsa sa mga debotos ni Senor Santo Nino.
Wala mabangbang ang sakripisyo sa mga debotos nga moapil sa pagsaulog sa kapistahan sa Mahal nga Bata bisan pa man sa mga problema nga giatubang sa katawhan.
Dinhi makita ang ka-espeso sa paghigugma ug kadako sa pagsalig sa mga katawhan sa kagamhanan ni Senor Santo Nino.
Alang sa mga nagpunsisok nga mga katawhan panahon sa misa ug sa prosesyon, husto lang kaayo nga magsakripisyo tungod og alang sa pagsaulog sa Batang Hesus.
Apil na niini ang gusto nga magpasalamat tungod sa mga grasya nga nadawat ug kadtong dunay mga gipangayo o nangaliya pa sa mga grasya gikan sa kahitas-an.
•••
Dili ikalimod nga dunay daghan nga mga katalagman nga nanghitabo karon nga lisod sabton kon basehan nato ang naandan nga mga panghitabo.
Dili na parehas ang rota nga giagian sa mga bagyo, mas kusog na ang hangin ug kamangtas sa mga bagyo. Apil na niini ang dili matagna nga panghitabo sa usa ka linog, hinay man o kusog.
Hasta pa ang pagbuto sa mga bulkan, sama sa Taal Volcano ug uban pa nga mga bolkano sa lain-laing lugar sa kalibotan.
Kining maong mga panghitabo nagkinahanglan og padayon nga mga pangaliya sa katawhan tungod kay klaro kaayo nga wala gyod kitay mahimo kon moandar na ang kabangis sa kinaiyahan.
Sama sa gituohan sa kadaghanan, walay imposible sa Labawng Makagagahom.
•••
Daghan ang natingala sa pagka-tudlo sa bag-ong hepe sa Philippine National Police nga si General Archie Gamboa.
Sa wala pa siya gitudlo ni PRRD, atong nahibaw-an nga nasakpan ang PNP nga dihay “milagro” sa ilang procurement sa mga himan sa mga kapolisan.
Klaro nga pangurakot ang maong isyo.
Ug mao kini ang hinungdan ngano nga gitudlo ni PRRD ang DILG Secretary nga lang usa ang mag-maneho sa kapolisan samtang wala pa gitudlo ang ilang hepe. Gikuhaan sab ang PNP og katungod pag-procure sa mga himan.
Apan takulahaw lang, gibalita nga gitudlo na ni PRRD si Gamboa nga maoy mag-mando sa PNP.
Unsa kahay hinungdan niini?
•••
Tungod sa inadlaw nga panginahanglan sa pagkaon og kakulang sa mga mag-uuma, adunay programa karon nga giandam aron masabtan sa mga kabataan ang kamahinungdanon sa panguma ug ingon man, ang pagsabot nga dunay kwarta ang pagpananom.
Dunay plano nga ibalik ang pagpananom sa mga kabataan gikan sa Grade 1 ngadto sa Grade 6 unya ang mga LGUs ang mopalit sa ilang mga tinanom nga mga utanon.
Ang kwarta o abot sa pananom, tigumon unya ihatag kini ngadto sa mga kabataan panahon sa gradwasyon kada tuig. Buot ipasabot, masabtan sa kabataan nga duna silay mapaabot nga kwarta inig tak-op sa eskwela. Daghan ang ilang madawat kon daghan sab ang ilang mga tinananom.
Ingon usab niini ang mahitabo sa mga estudyante sa Grade 7 ngadto sa Grade 12 sa mga pang-publikong tulunghaan.
Kon buhaton kini sa tibuok rehiyon, makita dinhi ang dakong kalainan dili lang sa abunda ug presko nga mga pagkaon, hasta sab ang makuha nga pagtulun-an sa mga kabataan mahitungod sa pagpananom.
Dili ba angay nga suportahan nato kini?