DILI angay mag-panic apan dili mokompiyansa labina sa health workers. Kini ang pasidaan sa Department of Health (DOH) human nakasulod na sa Pilipinas ang gikaintipang bag-ong strain sa coronavirus nga unang nakaplagan didto sa Wuhan, China.
Gikompirmar sa DOH nga usa ka 5-anyos nga bata ang gi-quarantine karon sa nag-unang publikong ospital sa Sugbo. Ang pasyete nibiyahe gikan sa Wuhan ug Guandong, China uban sa iyang inahan aron mobakasyon dinhi, apan nasuta nga may hinalat, pangatol sa tutunlan ug pag-ubo-ubo sa pag-abot sa Mactan Cebu International Airport (MCIA) niadtong Enero 12, Sabado. Dunay direct flight sa Guandong ug Cebu.
Sumala sa DOH, ang bata hingpit nga gi-quarantine atol sa bisperas sa Sinulog, Enero 18, human positibo ang samples sa bata pinaagi sa non-specific pancoronavirus assay, apan walay kapasidad ang ospital sa pag-ila sa specific coronavirus strain busa ang samang samples gipadala sa Australia aron pag-ila sa strain sa coronavirus ug hingpit nga deklarasyon sa virus sa bata kon pareha sa nakita sa China.
Apan ang inahan ug laing duha ka Chinese nationals gipagawas sa ospital human sa pagpaubos sa eksaminasyon apan padayong gi-monitor human wala pa napagawas ang resulta sa non-specific pancoronavirus assay.
Ang World Helath Organization (WHO) gikatakda nga magtigom sa pagtuki sa bag-ong virus apan nagdumili sa pagdeklarar og alert human dili pa usa daghang ang natakboyan sa maong virus. Dinhi sa Sugbo, wala kita masayod kon unsay kalamboan sa maong taho sa mga mosunod nga adlaw.
Maayong kalma apan andam. Pamintinar og maayong immune system pinaagi sa pagkaon sa puno og nutrina, igong pagpahuway, pagbiya sa bisyo ug kon mahimo, likay sa dapit nga daghang tawo.
Walay takos sa pagpangadam.