NINGBANGON gikan sa tulo ka sunodsunod nga kapildihan ang hosts Boston Celtics ug wala panumbalinga niini ang pagbalik og duwa ni Anthony Davis sa gikahadlukang Los Angeles Lakers sa ilang pagposte og dakong kadaugan, 139-107, kagahapon sa National Basketball Association (NBA).
Gipangulohan ni Jayson Tatum ang kadaugan pinaagi sa iyang 27 puntos samtang ningdugang og 20 puntos matag usa sila si Jaylon Brown ug Kemba Walker.
Dili ikalimod nga malipayon ang Celtics sa ilang dakong kadaugan batok sa usa sa labing mga inilog nga makalangkat sa korona ning maong season apan labing seguro, wala’y makatupong sa gibati ni Walker.
Sulod sa 29 ka mga duwa, mao kini ang labing unang higayon nga midaog si Walker batok sa usa sa mga lider sa Lakers nga si Lebron James sukad pa niadtong mga higayon nga nagduwa sila sa laing team.
“I’m happy I got one at least, before he goes,” matod ni Walker. “Who knows how long he can play, because he’s just incredible. But you know, it’s only one. One and 28.”
Dako sab og natampo sa kadaugan sila si Enes Kanter ug Gordon Hayward.
Nitampo si Kanter sa Celtics og 18 puntos – tanan iyang gimugna sa 1st half – ug 11 rebounds samtang nihatag og 16 puntos si Hayward.
Ang Lakers mao unta ang unang ningratsada ug nakaposte dayon kini’g 8-0 run sa pagsugod sa duwa nga gituldokan og hansak ni Davis sa wala pa’y usa ka minuto ang nakuha sa oras.
Apan human niini, nakaangkon si Davis og duha ka sunodsunod nga fouls hinungdan nga gipalingkod kini’g balik ni coach Frank Vogel aron sab makapahuway kini hilabi na nga mao pa lang ang pagbalik niini’g duwa sulod sa duha ka mga semana.
Wala usiki sa Celtics kining higayuna ug gipandandar sab dayon nila ang ilang opensa nga gisugdan sa three-point shot ni Hayward.
Human niini, nausab na ang templada sa duwa ug hinayhinay na nga ningdominar ang Celtics. “The less he (Davis) plays, the better for everybody else,” matod ni Celtics coach Brad Stevens.
Ang Celtics ningsaka sa 28-14 nga rekord, ikaupat sa Eastern Conference, samtang ang Lakers nagpabilin sa liderato sa Western Conference bisan ningdakin-as sila sa 34-9 nga rekord.
Sa usa ka talagsaong hitabo, dili si James o Davis ang nangulo sa Lakers ning higayuna kon dili si JaVale McGee, kinsa nagpakatap og 18 puntos.
Si James igo lang nidugang og 15 puntos alang sa Lakers, ningtampo og 13 puntos matag usa sila si Kyle Kuzma ug Rajon Rondo samtang nitunol lang og siyam ka mga puntos si Davis.
Usa sa dakong hinungdan sa dakong kadaugan sa Celtics mao ang ilang three-point shooting diin nakapasulod og 16 ka mga itsa nga gipangulohan ni Tatum, kinsa adunay lima. (AP, ESL)